古天后日誌|港股高位整固 穩守10日線後市仍向好

12月7日, 早上部份時間多雲,天氣清涼,日間大致天晴,天氣乾燥,注意早晚溫差較大。美國聯儲局下周議息,議息前市場忽然又再憂慮聯儲局繼續進取加息,並拖累美國經濟明年陷入衰退,美股隔晚跌勢持續。三大指數跌幅超過1%,道指跌350點;標指跟納指分別跌1.44%及2%。標指繼續喺3900-4100之間整固,呢兩日已逼近3900支持,只要呢個位仲守得住,美股都仲未要轉勢。

根據往績紀錄,美股其至全球股市喺12月份表現唔會太差,主要係年結關係,暫時標指跌入12月以嚟跌咗3.4%,可能要等議息後,好友先再出擊。不過近日先後有大行唱淡美股,但美銀數據卻顯示,機構投資者已連續四個星期淨買入美股,只有對沖金喺過去一個星期由淨買入變成淨賣出,反映對沖基金已完成回補空倉。正因係咁,美股嚟到呢一段已再無之前因為挾空倉升得既急且快。

大行不約而同唱淡經濟,高盛表示明年美國經濟只有1.9%%增長,而全球經濟更顯著放緩。喺經濟可能放緩下,通脹卻仍保持4%以上,企業面對融資成本增加及盈利受壓,資金轉向投資美國國債亦無可厚非。

港股近日表現強勁,恒指由17000水平抽升至19500水平,所花時間只係一星期左右,已到達之前古天后所估計嘅目。嚟到現水平,值博率已大大降低,持盈保泰係今個月餘下日子嘅策略。雖然現水平唔再追貨,但喺成交持續暢旺下,古天后對後市睇法係審慎地樂觀,目前港股最大風險,係美股嘅回吐會否拖累港股齊齊回調。

留意10日線目前已升至100日線水平,兩者分別處於18508及18347,當10日線升穿100日線再形成另一個黃金交叉,後市仍有條件向上挑戰。不過通常出黃金交叉後,大市都有機會出現回調,而19500-19600水平,亦係由年初高位25000向下移所形成嘅下降軌頂部,要突破條下降軌亦需要時間。預期港股呢幾日或需要進行整固,至於回調幅度有幾大,要視乎美股走勢。初步恒指支持大約係19200水平,失守就有機會再進一步下調至18500水平,睇好後市想買貨,暫時都係忍忍手,待大回落至19000水平之下再考慮。

訂閱星島網singtao.ca電郵快訊,每天可收到最快新聞資訊: https://www.singtao.ca/subscribe/singtao.php

【看星島*知天下】請立即下載「星島新聞(加拿大版)」App:
iPhone:https://apple.co/2IBi812
Android:https://bit.ly/2Pe8anu
share to wechat

延伸閱讀

share to wechat

延伸閱讀

中金:聯儲局或於5月暫停加息

在美上市中概股普跌 阿里巴巴挫3%

加P影響Non Means 學生捱貴息 全期要還多51%

醫渡科技獲寧波市第一醫院採購合同

都市網新聞