独家丨郑浩南“家变”同老婆冇嘢讲：都揾唔到佢 期待同旧爱柏安妮囡囡合演父女

58岁郑浩南（Mark）婚后定居马来西亚多年，主力搞生意，为家庭减少拍电影，但今年突然活跃连拍三套戏，听他在煞科宴自爆20年婚姻出现危机，马来西亚籍老婆鲍爱玲（Elyn）跟一对仔女突然“消失”，终于师傅明白了。他接受《头条日报》独家访问承认目前跟家人联络要靠律师传话，但一切会向前看，开心见到香港电影愈来愈有质素，或会定居香港多拍戏，更笑指得知旧爱柏安妮囡囡许恩怡入行，期望在戏中合演父女。采访：杜杜 摄影：Stanley

Mark哥选择在尖沙咀接受访问，因为他在该区长大所以特别有亲切感。

 

Mark哥早前出席有份主演的电影《壹狱II 劫数难逃》煞科宴时，自爆在内地工作16个月后返回马来西亚却人去楼空，已联络不到太太Elyn及一对子女，又暗示太太有出轨之嫌。之后他又上载58岁生日的自拍片，大呻“家变”孤单庆生的无奈，“我觉得真系冇咩值得庆祝，因为我喺嚿年（2021年）已经知道自己乜嘢都冇晒，包括我个女同我个仔。”但又表示有好多好朋友、父母及兄弟支持，所以不会放弃。

9月中，Mark哥出席有份主演的电影《壹狱II 劫数难逃》煞科宴时，自爆婚姻出现问题。

 

10月6日58岁正日生日的Mark哥，上载自拍片贺自己生日。

 

为凑女宁愿放弃拍电影

99年，Mark哥认识了刚由外国读完书返马来西亚发展的Elyn，决定淡出电影圈，“马来西亚老前辈话，介绍女仔畀我识，后尾仲做埋我太太𠻹！𠮶时啱啱香港电影有少少停滞不前，出嚟嘅质素好参差，马来西亚同香港都好近，于是我将香港所有嘢都卖晒，去咗马来西亚做生意。”为了爱情Mark哥放弃香港一切，两年后他为了首个女儿，更全面停工凑女，“头一年我乜都唔做，日日对住个女，睇住佢嘅成长过程，电影或者工作方面就放低咗。”

2002年Mark哥跟马来西亚籍的Elyn结婚后，2004年及2012年分别诞下长女喜文（Jade）及细仔理文（Jacob）。

 

Mark哥婚后定居马来西亚，主力经营食肆生意。

 

留内地每日跟家人联络

近年Mark哥转到内地发展，曾搞过进口汽车及冬甩生意，亦会间中做商演，“佢哋好热衷、好响往香港艺人，有啲咩开张就揾香港艺人嚟，全世界都冇人愿意使呢啲钱，但佢哋好愿意，佢哋好大方，疫情期间我过咗去，你肯做日日都有人揾你，但我都系做啲熟朋友嘅嘢。”

因疫情Mark哥逗留内地16个月，当时每日都会跟身在马来西亚的家人联络，“一日差不多十几个电话，几个video call咁样，同我个仔、个女，我老婆呀，全部一路都有。”但他估不到一夜间会“家变”，“我全部生意都喺马来西亚，但一吓就冇晒。”问到跟太太Elyn现在情况，他不欲多提，只无奈话：“大家都唔使讲咁多嘢，根本都讲唔到嘢，冇咩需要讲，就你用你律师我用我律师，靠律师沟通，我系揾唔到佢，全部嘢cut晒，都唔好再讲，作为资深演员唔会拎呢啲嘢做宣传，过去嘢就过咗去，唔好望后面，望前面啦，望镜头。”现在对爱情的看法，Mark哥只求顺其自然，更告诫年轻人要考虑清楚才结婚生仔，“我同自己讲我唔会变，但系造物弄人，好多嘢未必自己决定到，好多嘢唔系你自己守得住就得。”

Mark哥为了看着女儿成长，放弃了香港的演出机会。

 

访问当日，Mark哥手上仍戴有结婚戒指。

 

赞后辈个个听教听话

积极向前的Mark哥，返港大半年keep住“望镜头”拍了三部电影，他开心香港电影再现生机，“2022年对我嚟讲系唔开心嘅，但亦都好开心见到香港电影翻生，系值得鼓励，以往荷里活先做到嘅特技，香港已经融合到晒。”Mark哥更大赞新一辈艺人，好似刚在电影《拼命三郎》中合作的林家熙 （Locker）、应智越（细猫），特别是戏中演他儿子的细猫，“佢唱歌真系几好听㖞！但系我同佢沟通唔到，我识日文佢识韩文，哈哈！佢几好，我唔系特登赞香港啲新仔，佢哋都听教听话听讲，有礼貌，尊师重道，我见过好多新仔，未见过一个新仔唔得。”

 

Mark哥今年返港连拍三套戏，其中有跟陶大宇合作的《扎职3》。

 

在电影《拼命三郎》，Mark哥跟老拍档谭耀文再斗演技。

 

Mark哥在电影《拼命三郎》，跟后辈Locker和细猫合作。

 

 

讲到旧爱柏安妮（Ann）囡囡许恩怡（Natalie）已入行，原来Mark哥早已收到风Natalie有演技又识打，仲话想合作，“同佢合作，佢个女做我个女，哈哈！”原来他跟柏安妮曾在饭局碰面，一直保持联络，“今日佢先打电话畀我，佢咁啱去咗马来西亚睇佢阿妈，阿Ann个妈妈同我好好，今日生日96岁，佢仲同我讲‘阿Mark你真系冇变，你睇我老到呢’，佢仲好精神同健康。”

Mark哥跟柏安妮因合作电影而认识，曾相恋四年。

 

柏安妮（前右二）囡囡许恩怡（前左二）已签约Kim（前左一）旗下，成为梁洛施（前右一）师妹。

 

近60岁的Mark哥keep得好fit，因每日维持早上跑步及健身。

 

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。