世界盃2022｜專欄:大哥屆時谷底反彈

終於嚟到世界盃十六強最後一輪賽事！淘汰賽階段大部分強隊都能順利過關，年輕球星如基利安麥巴比、布卡約沙卡都交出好表現；而哈利卡尼、美斯、基奧特等沙場老將亦證明自己寶刀未老。但有位球星斯人獨憔悴，就係葡萄牙球王C朗拿度。

其實C朗今屆嘅表現唔算特別差，過往除咗一八世界盃入咗四球之外，佢其餘出席過嘅世界盃決賽周都只係各入一球。雖然入球產量唔多，但今屆對加納射入一球十二碼後，已經破紀錄成為五屆世界盃決賽周都取得入球嘅球員。

以C朗拿度嘅級數，大家一定對佢期望甚殷，作為中鋒，睇得到佢嘅入楔觸覺及彈跳力仍然喺度，但爆發力已大不如前，因此難以再見到佢千里走單騎嘅表現。而且世界盃前夕，佢同前球會曼聯之間問題嘅處理手法，亦令到部分球迷對佢嘅印象變差。佢喺世界盃嘅表現甚至被足球數據網站Sofascore評為世界盃最差十一人之一。

嚟緊葡萄牙嘅對手瑞士，喺最後一場分組賽對住塞爾維亞都失兩球，防守一般。以「大哥」嘅脾性，愈俾人睇低就愈搏命，筆者認為嚟緊對瑞士嘅比賽中佢有望入球。  - 球樂

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。