独家丨黄德斌眼中只有Jeffrey娟姐劲呷醋 拍《百万》演夫妻拍出好感情爆笑互寸

黄德斌和练美娟（娟姐）继《大叔的爱》演Boss同秘书后，在新剧《百万同居计划》关系升级饰演萧氏夫妇。娟姐兴奋表示终于有个精壮男人做伴侣，又狂赞德斌是理想老公人选，以为德斌会回礼赞返佢，男方竟然赞两句就冇货，更冧爆“新欢”Jeffrey（魏浚笙），搞到娟姐呷晒醋更多口爆埋两个男人的特殊过瘾关系，最后德斌终于赞娟姐唔似角色咁野蛮，因为睇女方只狗唔会乱吠就知物似主人形，全场爆笑。 采访：杜杜 摄影：朱伟彦 服装：Beauty&Youth and Sculptor from ITHK(娟姐)

德斌同娟姐再合作更加熟络，互窒完全唔使畀面。

 

德斌认为现实好难有咁荒谬的事，作为演员当然要见识这个“同居计划”。

 

娟姐话如果真的咁易揾100万，就算要同陌生人同居都会参加。

 

 

娟姐坦承德斌演老公绝对是梦想成真，“我不嬲同公司讲，畀个精壮男人我，点知有日瞓醒就收到呢个剧本，老公系黄德斌㖞，哗！𦧲饭应！”是否代表肥仔唔够精壮？娟姐就重申：“对于精壮嘅定义大家都少少不同，呢个真系好壮健嘅男人，又高大，喺佢隔离好似小鸟依人咁。”被娟姐狂赞的德斌反而质疑对方背稿，“呢啲对白仲唔系背嘅，顺到咁样。”娟姐亦老实不客气，“我等你赞我，畀咗好多空间你。”德斌唯有赞返“哎吔老婆”，“人又靓，心地又好，非常善良，身材大家有目共睹啦！”

德斌赞娟姐身材好，有相为证㗎！

 

剧中“萧遥”是爱妻号，为老婆“萧万丽珠”参加“百万同居计划”。

 

娟姐靠角色满足对老公幻想

剧中德斌演的生意人“萧遥”是个爱妻号，希望老婆“萧万丽珠”能享福先参加“百万同居计划”，本来钟意讲大道理，但一见老婆就收声，娟姐说：“佢老婆有少少眉头眼额唔同，佢都即刻𠱁，爱妻号即系爱妻号。”娟姐都想有个咁完美老公，“梦寐以求，外形上已经好fit啦，作为女仔，如果你另一半，包容到你嘅野蛮，所有女仔都好钟意。我都会幻想第时有老公撒娇𠮶时点样，呢套剧满足晒我呢啲幻想。”德斌就睇穿娟姐唔似角色咁野蛮，“娟姐唔系咁嘅人，睇佢只狗就知，物似主人形，佢只狗从来都唔吠，我想像佢喺屋企比较静。”不过德斌就否认现实是“萧遥”级数的爱妻号，“我比较讲道理多啲，一啲无道理嘅嘢，我会尽量希望令到佢有道理。”他更赞太太不似萧太咁无理，“梗系啦，唔系点相处啫！”

畀老公抱起呢啲冧爆情景，完全满足晒娟姐幻想。

 

德斌话自己都算爱妻号，但未至于“萧遥”的程度。

 

Jeffrey开工狂讲废话冇人理

讲到同《大叔的爱》班底再合作，德斌认为大家已有一定默契，再加上有新拍档Jeffrey和霍哥加入，多了很多火花，他更大赞初合作的Jeffrey，“佢系个好想样样做得好嘅小朋友，好有自信，好有准备，唔会错得去边，希望佢继续努力畀啲心机。（好多人话佢演戏有天份？）唔好赞佢啦！佢会嚣，佢已经多嘢讲，你再赞佢咪更加多嘢讲。”

《百》剧大部份都是《大叔的爱》班底，合作起来更有默契。

 

估唔到Jeffrey竟然成为德斌同娟姐之间第三者。

 

见德斌个慈父冧样出晒嚟，娟姐摇晒头个醋坛终于爆！“佢好钟意Jeffrey，佢哋好冤气好烦㗎！Jeffrey钟意讲埋啲废话，台前幕后都冇乜人理佢，真系得我哋两夫妻会同佢继续噏落去，所以佢好钟意捉住我哋讲一大堆废话，好似揾到知音人。”德斌就解释因Jeffrey能量太高，“佢过度活跃系咁发放，都要揾人接㗎，冇人接好惨㗎嘛。”娟姐再呻，“我一路想得到人称赞，一路都徒劳无功，真系阴功。”德斌知衰即补镬赞返娟姐，“戏裹面可爱，出面就好可爱。”不过娟姐依然不满，“答得麻麻哋，零分重做跪玻璃。”她再爆德斌对Jeffrey的爱，“佢真系好钟意Jeffrey，佢都有少少贪图佢美色，成日都话咁靓仔，可能佢喺身上见到自己以前嘅影子。”德斌就唔认同，“边可能似我呀，见过我旧时嘅人唔会觉得，冇可能我会似佢，佢会嬲㗎！”

德斌和Jeffrey早前更一齐拍广告，饰演穿越时空的两爷孙。

 

娟姐开心爱犬“乌冬”都有份演出，开心两“母子”一齐开工。

 

电影版冇声气转拍《大伯的爱》

一直有指会开电影版《大叔的爱》，问到两人有冇收到风，德斌就话未收到消息，娟姐笑指：“要问大叔，大叔点头先得㗎嘛！”德斌答得抵死：“或者拍套《大伯的爱》，哈哈！”娟姐寸嘴回应：“帮自己谂到咁后，过几年仲有得捞就叫《大伯的爱》。”搞到德斌嬲嬲哋，娟姐知太唔客气即补飞，“佢个人好有远见，帮大家谂之后𠮶几年会有啲咩做，佢𠵱家都忙紧舞台剧！我已经买咗飞支持！都系佢帮我买咋！（老婆福利？）梗系啦，我谂娟姐都会有呢啲福利，系咪呀？”德斌识做话：“梗系啦，当然啦，点会冇。”最后娟姐终于笑返，“佢冇得say no，我好开心，我好似大王咁，讲咩佢都话系。”

《大叔的爱》时，娟姐演德斌秘书。

 

德斌最近为舞台剧《短暂的婚姻》彩排，娟姐已识做买飞支持。

 

 

娟姐平时好似好大胆，但同德斌影亲密照竟会怕丑，唔敢正眼望兼会面红。

 

这种程度的亲密照，娟姐竟然都会怕丑㖞！

 

剧内德斌对娟姐千依百顺，现实绝对是两回事。

 

 

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。