【曾智華專欄】李梓敬與湯家驊

政治圈，不少記者形容近兩年悶到抽筋，完全冇乜人或事再值得一提，係咪呢？絕對唔係！
　　
尤其如小弟呢類「傳媒精」，若果呢樣又話悶，嗰樣又話冇趣，咁就絕對唔適合食呢行飯。
　　
應該點？應該一如講波佬、講馬佬，明明場馬、場波悶到瞌眼瞓，但專業的，不論中外，一定會照舊眉飛色舞，講到精采無比，如此才算是有料到。
　　
若各位唔知唔識？介紹你賽馬日，打開直播，聽聽廖浩賢點Call馬，就知我講乜嘞。
　　
朝朝打開政治版，點悶也好，仍有嘢值得講。例如今日我就想「提點」一下李梓敬議員，因佢有件事，不成體統！正是竟然著到非常Casual，T恤杏色褲，普通波鞋，咁就走去中聯辦莊嚴的靈堂弔唁，明顯與其他人大代表、行政立法會議員的清一色黑禮服，有極大差別。
　　
記者一睇，當然知唔妥，問佢點解。竟然答：「因太遲收到通知，無法趕回家換衫。」
　　
但點解其他議員又得？可能李議員實在太Green，唔知道做高官好、議員好，甚至記者都好，在辦公室，必須常備一套得體的黑色套裝，以備一Call就「去馬」！邊有人等你返屋企換衫㗎？真係儍儍哋。結果，出來全不得體！老友，家陣你去向國家前主席江澤民鞠躬呀！
　　
又講講另一位行政會議成員湯家驊。佢已脫離主流民主派多年，因思想有變，於是自組另一議政團體民主思路。不過，可能政見有點「唔湯唔水」，結果多次派員出選立法會，全部得個桔，身水身汗仍冇乜支持，零議席。
　　
而佢自己，幸因「旗幟鮮明」，唔使選都可以坐行政會議，凡有法律問題就衝出來「解畫」。
　　
搞智庫或政黨，當然要籌款。民主思路決定明年初辦籌款晚宴，並將邀請特首出席，賣枱價十萬元至三十萬元，掂唔掂？
　　
老友，商界及政界，只講兩個字——現實。所以，民建聯籌款，從來唔憂，因大把議席兼阿爺錫晒。民主思路？有點尷尬，從多次選不到立法會，已知⋯⋯今次籌款，將是「一面鏡」！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。