世界杯2022｜专栏:巴西要出线 尼马好关键

㖊日讲完日本对克罗地亚，今日讲埋韩国对巴西。“太极虎”上届世界杯喺分组赛最后一战对德国，最后靠一个反击入波令德国出局。今届世界杯同样靠一个反击入波，唔单止令自己出线，更加将乌拉圭打入地狱。足球嘅嘢，有时真系咁奇妙。

韩国上场再次展示非一般嘅后劲同斗志，就连状态一般嘅孙兴民都交出非常靓嘅助攻，睇到艾尔拍烂手掌。只不过喺场葡萄牙上半场同下半场嘅表现，完全系两个样嚟。下半场全队唔系好压逼对手，组织攻势嘅速度都好慢，换人方面亦愈换愈弱，似乎有啲留力。当然，C朗上场继续正选，但系埋门连环失机，想争神射手极唔容易。

巴西上场对喀麦隆同样出咗唔少副选，就咁睇实力依然几强。不过，埋门把握力麻麻，连番攻门都过唔到对手门将嘅十指关，更加俾对方一次反击得手。艾尔完全感受到巴西𠮶种留力，可惜加比尔捷西斯伤出，兼无办法继续世界杯之旅，令巴西前线进攻少个选择。

“森巴军团”今仗关键系尼马能唔能够复出。艾尔唔系话云尼斯奥斯祖利亚、洛迪高高斯、加比尔马天尼利呢啲球员能力唔好，但尼马的确有种能力，可以扯散对手防线，造就队友入楔攻门。巴西之前对防守密集嘅瑞士，未领先之前都踢得几老鼠拉龟。所以，尼马如果能够及时复出，会对巴西进攻有好大帮助。

韩国对上一次赢巴西系九九年嘅国际赛，近三仗入十球失一球，睇落完全无得打。不过今年经常有爆冷赛果，韩国全队士气亦非常高昂，希望孙兴民能够再度挺身而出。艾尔情感上撑韩国，投注上就谂谂买半场和。  -艾尔

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。