世界盃2022｜專欄:巴西要出線 尼馬好關鍵

噚日講完日本對克羅地亞，今日講埋南韓對巴西。「太極虎」上屆世界盃喺分組賽最後一戰對德國，最後靠一個反擊入波令德國出局。今屆世界盃同樣靠一個反擊入波，唔單止令自己出線，更加將烏拉圭打入地獄。足球嘅嘢，有時真係咁奇妙。

南韓上場再次展示非一般嘅後勁同鬥志，就連狀態一般嘅孫興民都交出非常靚嘅助攻，睇到艾爾拍爛手掌。只不過喺場葡萄牙上半場同下半場嘅表現，完全係兩個樣嚟。下半場全隊唔係好壓逼對手，組織攻勢嘅速度都好慢，換人方面亦愈換愈弱，似乎有啲留力。當然，C朗上場繼續正選，但係埋門連環失機，想爭神射手極唔容易。

巴西上場對喀麥隆同樣出咗唔少副選，就咁睇實力依然幾強。不過，埋門把握力麻麻，連番攻門都過唔到對手門將嘅十指關，更加俾對方一次反擊得手。艾爾完全感受到巴西嗰種留力，可惜加比爾捷西斯傷出，兼無辦法繼續世界盃之旅，令巴西前線進攻少個選擇。

「森巴軍團」今仗關鍵係尼馬能唔能夠復出。艾爾唔係話雲尼斯奧斯祖利亞、洛迪高高斯、加比爾馬天尼利呢啲球員能力唔好，但尼馬的確有種能力，可以扯散對手防線，造就隊友入楔攻門。巴西之前對防守密集嘅瑞士，未領先之前都踢得幾老鼠拉龜。所以，尼馬如果能夠及時復出，會對巴西進攻有好大幫助。

南韓對上一次贏巴西係九九年嘅國際賽，近三仗入十球失一球，睇落完全無得打。不過今年經常有爆冷賽果，南韓全隊士氣亦非常高昂，希望孫興民能夠再度挺身而出。艾爾情感上撐南韓，投注上就諗諗買半場和。  -艾爾

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。