世界盃2022｜專欄:防反唔怕舊 最緊要受

今屆世界盃有三隊亞洲球隊殺入十六強，算係近屆比較罕見嘅情況。睇番日本、南韓同澳洲晉級過程，並唔係打啲好華麗嘅足球。

日本可以殺低西、德兩國，控球比率超低，但防守反擊奏效。對哥斯達黎加要做主攻嘅一方，就踢得老鼠拉龜。南韓補時熱血反勝葡萄牙，入波都係靠反擊，加上對手下半場踢得散漫，贏波係有啲幸運成分。睇番「太極虎」對加納一仗，下半場佔盡控球同進攻優勢，結果仍然輸波。澳洲兩場小勝突尼西亞同丹麥，又係靠防守反擊。「袋鼠兵」遇著攻力極強嘅法國，結果就被大炒一場。換言之，呢三支亞洲球隊賽果上睇落可同歐洲強隊抗衡，但過程上仍有好多位可以做好啲，包括要主攻嘅時候，點樣拎到士哥。

只不過，隨著愈嚟愈多亞洲球員外流，不斷適應體力化、高位逼搶嘅打法，比較容易跟得上歐洲球隊嘅節奏，係今屆大幅進步嘅其中一個原因。以前日本隊球員好多都係嚟自本地聯賽，但近兩屆面目全非，表現亦截然不同。所謂取長補短，如果愈嚟愈多亞洲球員可以去歐洲搵食，艾爾相信亞洲足球係可以跟上歐洲足球嘅水平。

「東洋武士」將會面對上屆亞軍克羅地亞。森保一相信會繼續擺三笘薰喺後備，但「橋唔怕舊，最緊要受」，今場仍然先穩守後反擊。克羅地亞嘅中場莫迪歷狀態保持得唔錯，但前線把握力則有待改善，後防亦唔算太穩陣，今場面對日本嘅突擊，都唔係咁易頂得住。

艾爾今場賽前不作投注推介，並估計下半場會比較多入波，走地見到有入球大細「1.5」大有比較高?賠率先再考慮。 艾爾

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。