世界盃2022｜專欄:美國逼搶克荷蘭

三十二場分組賽終於完晒，等艾爾好似《猜波台》某位忠實聽眾咁，用「數白欖」總結下先。

卡塔爾零分出局，係歷屆主辦國之辱。英格蘭首名出線，簡尼射門鞋去咗邊？阿根廷後來居上，翻版Sam哥心很傷。丹麥全隊狀態差，輸畀澳洲認真抵話。日本殺低兩強隊，德國出局咎由自取。比利時黃金末代，歐洲紅魔風光不再。巴西今屆重逼搶，缺少尼馬實力仍強。葡軍新星多的是，C朗都要行埋一邊？非洲球隊好出色，天時地利夠晒威力。殺入淘汰賽階段，美斯能否得償所願？留意《猜波台》直播，包你睇到笑呵呵，笑呵呵！

緊接住嚟十六強，下線形勢會比上線緊張。艾爾今屆比較鍾意的荷蘭就喺上線，今晚會同美國一決勝負。本來對「橙衫軍團」有啲期待，但頭三場賽事踢得一般。球隊只有加普比較搶鏡，迪比做咗「隱形戰機」，杜費斯喺邊路貢獻有限，而中場活力唔夠，全隊踢到老鼠拉龜。雲高爾要諗下辦法，點樣提高球隊攻力，如果未能夠盡快入波，今場對住美國，艾爾覺得會非常難踢。

美國再度晉身十六強，實際並非僥倖。美國打法以高位逼搶為主，再等機會打反擊。上場就係靠前線持續壓逼，令伊朗下半場踢得非常辛苦。事實上，祖殊沙根特、基斯甸普列錫、達斯等球員已經喺歐洲球會搵食，非常熟悉高位逼搶打法。球隊只需要改善前線把握力，並不斷向荷蘭中場施壓，相信可以為對手防線帶嚟麻煩。

艾爾覺得美國打法可以克制荷蘭，呢場推介讓球受讓「+0.5/+1」下盤，半場和亦諗得過。  - 艾爾

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。