【曾智華專欄】黎昭昇初步減壓

真正支持體育運動者，除會為勝出歡呼外，一定也會為落後者打氣，此乃體育精神。
　　
賽馬，當然如是。今屆挾超卓戰績空降香港的紐西蘭明星練馬師黎昭昇，開季之後，一直陷於苦戰，直至星期三前，仍只得一W。馬場乃英雄地，尤其佢比起香港今季升正的「土炮」伍鵬志，論成績，昇仔真係尾燈都唔見，因志仔已贏咗十一W也。若以成敗論英雄，黎昭昇點「對得住」自己的名氣？不過，資深馬迷仍會默默為佢祝福，希望快點展露真功夫，否則，肯定面對無情的一沉百踩，分分鐘要黯然離開。
　　
昇仔的壓力，從面上完全展露。初初到港時，信心滿滿，臉上帶光彩，點知，慘，不停輸。就周三熒幕所見，明顯瘦咗、乾咗，兩鬢標出不少白髮。
　　
幸而終在雙親及妹妹專誠飛來香港打氣後，恍似撻返著副贏馬機器，周三立即起孖。
　　
不過，雖擺脫包尾大幡位，但至今所贏三場，皆在跑馬地，幾乎全是一放而回，意即其實贏在馬匹超級實力。
　　
看台當然希望佢下一步能走出「場仔」快活谷，改在「大場」沙田一顯身手啦。
　　
明天黎廄出六隻，冇隻似有冠軍相，不過，唔緊要。例如周三頭場隻「創福威」，也本來是零冠軍相，出戰十一次，全部三甲不入，大部分冷到幾十倍。終由希廄轉到黎廄，操足再配冷門騎師楊明綸，竟由上次出賽的四十七倍變隔夜七倍，顯露信心，閘前更跌至四倍，即係——贏面九成半！果然清風送爽，衝過終點。
　　
究竟黎昭昇還有幾多隻是上手馬房唔識操，落到佢手會變身的呢？易，睇隔夜賠率啦，一旦熱到「不合理」，即係嚟料。
　　
如今練馬師榜，「過江龍」真慘情，包尾三位皆外籍練馬師，且看苗禮德及高伯新能否浮上水面了，否則，極大機會今季收警告信。
　　
大戰之前，明日安排的戲碼極普通。小弟認為潘頓及布文必有馬贏。前者「金鼓齊昇」，後者「喜報」，皆會熱，但熱食好過食白果啊！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。