世界盃2022｜專欄: 太極虎背水一戰無保留

「太極虎」南韓上場雖然僅負加納2:3，但全場氣勢就好似猛虎出柙咁，令對手後防非常頭痛，亦展示出百分百鬥志，輸波都值得鼓掌，而球隊出綫仍未絕望，因為家只落後加納兩分，而加納尾場要對急須搶分嘅烏拉圭，稍有差池隨時出唔到綫。

艾爾覺得南韓除咗講求體力化踢法，團體合作亦非常強，此同佢哋本身嘅民族特性，相信有一定關係。領隊保羅賓圖上場賽後領紅牌，今場須停賽，但南韓今場背水一戰，仍存出綫嘅一絲希望，球隊應該會上下一心，踢番上場對加納嘅鬥志波出嚟。

今場南韓嘅對手葡萄牙，上場贏埋烏拉圭，已經鎖定十六強席位。艾爾估計葡萄牙今場會有輪換，俾多啲後備球員落場。前綫除咗留意拉菲爾利亞奧，現效力賓菲加嘅干卡路拉莫斯、RB萊比錫嘅安達施華嘅表現亦同樣值得期待。另外，球隊嘅「精神領袖」C朗拿度今場估計會繼續正選，艾爾覺得C朗上場嘅表現好咗，今場睇下佢同後備兵點樣配合啦！

南韓方面，前鋒曹圭成上場兩個頭槌攻門相當有水準，制空力非常強，李康仁等球員亦展示唔錯嘅側擊同傳球能力。今場南韓如果繼續打「燒味波」，不斷喺邊路傳中，對葡萄牙後防都有一定威脅。當然，艾爾相當希望狀態低沉嘅「兒子」孫興民能夠打番場爭氣波，發揮番應有嘅水準，絕對可以令「太極虎」喺反擊方面如虎添翼。

南韓今場無咩可以保留，盡全力同葡萄牙拼死一戰，對方嘅後備球員亦有一定侵略性，兩邊互攻下應該有唔少入波，推介全場入球大細「2.5」大。      —艾爾

前鋒曹圭成制空力非常強。Reuters

 

南韓民族特性團體合作亦非常強。Reuters

 

預計葡萄牙會派副選里奧等上陣。Reuters

 

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。