【曾智華專欄】兩個年齡組別「重傷」

隨着防疫放寬，大型婚宴聚餐可以去到二百四十人，再加上影相唔使戴口罩，又可以唱歌跳舞，喜宴活動即時生返晒。前年去年今年已註冊的新人，紛紛補辦喜酒。加上出年為好年，相信又會有不少年輕愛侶衝閘。
　　
所以近期部分受歡迎的婚宴酒店及場地，「卜」到爆晒，要分早、晚兩場做，一於大賺特賺，豬籠入水。
　　
相連之下，婚禮服務的行業，包括樂隊、婚紗、化妝、攝影……全部大旺特旺。
　　
究竟結一次婚要花幾多錢呢？老老實實，多數失晒預算。因為初初拍拖時，不少人，包括長輩都會扮晒瀟灑，揚言冇所謂：「尊重年輕人決定啦，喜歡擺咪擺囉，唔擺去吓度蜜月也可，毋須搵埋啲無無謂謂錢去使啦，又要煩親友。」
　　
好嘞，到「入直路」談婚論嫁時，你會發覺長輩多慢慢轉軚：「嗱就咁，大搞就唔使嘞，親戚食餐飯，點都要嘅，費事畀人怪責話唔通知啦。」
　　
到真正訂場地時，哈哈，你就想「求求其其」搞，突然好多聲音話：「一生人一次，點都要做到好好睇睇嘅。」於是乎小弟當年已有句口頭禪——結婚等於破產！
　　
婚姻支出龐大外，當然最好自己租樓住，免出現「相見好同住難」啦。加加埋埋，怎不「破產」？
　　
幸而結婚有人情收，幫補多少，不至「出血失救」。
　　
講到人情，大家都知有公價。最新婚訊媒體公布，由基本的午間婚宴到上酒樓、私人會所、酒店及高級酒店，公布指為八百元至一千五百大元。準唔準呢？
　　
就小弟所知，唔係完全唔準，但偏低咗。今時今日做人情，出手已好少在一千元以下。尤其略有交情的，一千五百元至二千元是基本盤。
　　
若用此作平均計，近月至未來一年，有兩個年齡層會「重傷」。第一個為二十五到三十五，即同輩多於此階段成家立室，加加埋埋過萬元冇走雞。初出社會工作者，咪話唔杰。
　　
另一年齡層，為五十五到七十。全部老友排隊做老爺外父也，出手也不能輕。
　　
不過，喜事來的，大家一於笑住畀可也。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。