古天后日誌｜標指能否守住3900為後市關鍵

11月30日，日間天晴，晚上漸轉多雲，有一兩陣驟雨，晚間氣溫將顯著下降，溫差達十度，嚟緊幾日天氣顯著轉涼。美股隔晚偏軟，表現反覆，市場無乜特別消息，三大指數喺今晚小非農數據公布前，個別發展，道指微升3點，標指跟納指則下跌。標指升抵4100阻力位前繼續整固，能否守住3900為後市關鍵。

近日美股嘅科技股明顥跑輸，兩大龍頭Tesla跟蘋果公司未能帶動氣氛，前者因為大股東收購Twitter後減持Tesla股份，至今Tesla股價仍未能重返10月份低位；後者主要因為代工受內地疫情影響，喺iPhone14大賣下，亦未見追加訂單，令大行調低其全年出貨量。不過對於蘋果股價唔使太擔心，主要係公司喺今年4月已啟動其回購計劃，規模達900億美元，喺股價低迷下不斷有資金流入，令蘋果股價在現水平有一定支持。

美股走勢仍然由息口走向主導，10年債息已回落至3.62%，反映未來兩年有減息1厘嘅預期，不過目前講減息言之尚早，未來CPI數據及就業市場表現，將決定息口走向。雖然近日聯儲局官員頻頻放鷹，但從經濟數據分析，12月加息幅度將溫和，未來加息步伐料可放緩。12月聯儲局將舉行今年最後一次議息會議，只要加息幅度符合預期，一旦發放未來貨幣政策逐步放鬆嘅訊息，唔排除好友將發動另一輪攻勢，當標指升穿4100水平，將逼使淡倉回補，推高美股。

至於內地方面，有消息指內地或逐步放寛防疫措施，隔晚中概股跑贏，全線向上，但噚日港股急升，唔排除今日有回吐，但只要大市守住17400-17600，後市仍可以繼續向上，但100日線(18420)阻力唔係咁易突破，成交要配合，噚日成交額喺升市下回升至1667億元，反映大市升抵18000水平，仍有資金追入，只要美股氣氛唔係太差，中概股繼續硬淨，港股12月要成功突破100日線亦唔難，然後就係挑戰19000-19500，12月年結月份，都唔應該睇得太淡。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。