【曾智華專欄】條氣真係好唔順

小學時讀到一句形容詞，覺得好「中」——Actions Speak Louder Than Words。因見到幾乎身邊的所有人（當然有自己分），包括老師及長輩皆如是，全部「講一套，做一套」。
　　
例如叫學生切勿染上不良習慣，但老師自己就又煙又酒又賭。再例如長輩要求後輩有禮大方，但自己就粗言穢語，無禮小器，自私自利。
　　
見得多，就知此乃人性負面的一個真象——口不對心，齋講唔做。故從那時開始，已領略只講根本冇用，最重要有冇行動先？一如內地流行術語——聽其言觀其行。
　　
今日提起呢句話，因經常見到各國總統首相總理及外交部長，永遠將自己國家的一切決策行動，講到啱晒，而對手的就錯晒。其實三歲細蚊仔都唔信啦，何況懂思考的成年人？
　　
例如一個國家，講到自己幾有文化，國民質素幾高，日日在媒介不停「自己唱好自己」，有冇用呢？若真實情況果然如此，就相得益彰。不過，若是相反，咁就「衰多兩錢重」！
　　
倒轉，若從冇吹噓甚麼，但國民在完全冇強逼下，自發做出幾乎全世界人都不會做的得體行為，咁……你想唔由衷讚賞都唔得啦。
　　
對對對，小弟想講的，正是在卡塔爾睇世界盃的日本球迷。其質素之高，唔到你唔服！絕大部分球迷，捧完自己國家隊場，大叫大喊大吃大喝之後，多拍拍屁股就走人，剩下滿目瘡痍。
　　
日本球迷呢？則留下清理自己及別人的垃圾，再分類。不止，更有禮貌地邀請其他國家球迷，加入環保清潔行列，以人心感動人心。
　　
呢下對日本人來講，可能只是基本習慣。但放在國際傳媒一報道，立時令國家形象大大提升，遠遠比花上千億萬元，請國際公關高手去大賣廣告，「唱好」乜乜物物更為有效。
　　
講到環保，我真係有啲唔順。正是香港人，移民到台灣日本加拿大……全部都會火速乖乖接受當地的垃圾分類政策。但同一班人在香港，完全兩回事，係乜原因呢？

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。