世界盃2022｜專欄：東洋漫畫預言書

膾炙人口嘅日本漫畫《足球小將》，相信好多朋友都有睇過。但我諗大家估都估唔到入邊嘅場景，竟然在現實中逐步實現。沙特對阿根廷時展現嘅越位陷阱「蟻獅防守」、日本全場捱打再熱血反勝德國、巴西嘅李察利臣展示「足球改造人辛坦拿」式嘅倒掛金鈎，都令各位看官不禁嘖嘖稱奇。

其中日本反勝德國2:1嘅賽事，全員展示出頑強精神，儘管上半場已經因輸十二碼先落後一球，呢班東洋武士並無因為咁樣泄氣，更不斷喺球賽中製造到反擊機會，鬥志認真頑強。防綫上，先有門將權田修一如林源三般左飛右撲屢救險球，及後更有後備上陣嘅淺野拓磨，使出小志強絕招「直綫盤球」，於比賽尾段射破猶如「迪打梅拿」般穩健的德國門神紐亞十指關！喺漫畫故事入面，小志強就因為足球成績出眾被舉薦加入東邦學園，而淺野亦曾在高中時被校隊顧問勸說後加盟三重縣立四日市中央工業高等學校，就係咁造就咗呢個足以載入史冊嘅入球。
今晚日本隊只要繼續維持住不亢不卑嘅比賽心態，面對哥斯達黎加嗰條有「神龍」基羅拿華斯在陣都要失七球嘅防綫，應可坐和望贏。球樂

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。