世界盃2022｜專欄：加拿大出綫未絕望

話咁快，首輪分組賽踢完！剛周三上咗去《賽馬日在線》做嘉賓主持，一邊望住賽馬，一邊睇住德國對日本嗰場精采賽事，真係睇到我同黃總拍手叫好！

德國今場嘅死症同阿根廷輸畀沙特一樣，都是有把握力同後防輕敵問題，呢個係今場輸波嘅重大關鍵，前綫入球能力飄忽，似乎喺費歷克上任之後無好明顯嘅改善。嚟緊對年輕力壯兼狀態大勇嘅西班牙，隨時畀一隻又一隻「狂牛」撞散，唔通上屆分組賽出局嘅歷史會重演？

正如艾爾之前所講，三笘薰係日本嘅X factor，後備入替即刻令左路有晒活力。不過，要真正發揮X factor嘅威力，臨場調動嘅時機非常關鍵。領隊森保一今次做得極之好！先喺半場換入冨安健洋穩住防守，再趁德國球員體能下降，不斷換入前綫有速度嘅球員，等待機會打反擊，為日本攞得相當重要嘅勝仗。唔通畀人鬧得多，先至會成才？希望「一哥」可以保持水準，「東洋武士」係可以走得更遠㗎！

另一場分組賽加拿大對比利時，亦令艾爾印象非常深刻。事隔四十幾年再殺入世界盃決賽周嘅加拿大，對住上屆季軍比利時，唔單止無退縮，上半場不斷嘅高位逼搶，令到對手後防風聲鶴唳。最後仍然輸波，皆因前綫把握力唔好，球隊處理死球嘅部署一般，約拿芬大衞同艾方素戴維斯嘅狀態一般，進攻上貢獻唔多。難怪奇雲迪布尼賽後都話，加拿大球員呢場更加值得表揚。

加拿大今場畀全世界睇到，佢哋都可以踢到咁有侵略性嘅足球。之後只要保持今日嘅進攻模式，把握力好番啲，對住克羅地亞同摩洛哥，艾爾覺得仍有出綫希望。 艾爾                                              

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。