【曾智華專欄】Cheap精貼士

畀貼士,各處鄉村各處例。早年到美國讀書及到加拿大移民,最唔慣為當地餐廳畀貼士文化,不但「老奉」,簡直斷搶,唔畀唔得,否則反面。
  
而畀,仲要無論服務如何,就算差到飛起,都要畀足。否則追你九條街詛咒。
  
當時真的無法明白,貼士豈可勉強?更豈可不准隨意?咁點解唔似香港咁,將加一打埋落單處,大家免拗,不會引起無謂衝突。
  
好啦,後來到內地、台灣及日本旅行,咦……畀貼士,乜一切與美加相反,咁「筍」的呢?一律不收小帳,服務客人乃理所當然,絕不會貼士多啲,服務好啲,否則就黑面,真有種——大隻蛤乸隨街跳之感。
  
到出社會做事,見人見事多咗,懂得點點世情,知道人性所在,也知乜叫「識做」與「唔識做」,尤其觸及人際關係,點解有啲人特別乞人憎,有啲大受歡迎呢?並非似啲蠢人以為一個「錢」字作怪。其實人人有自尊,你在「識做」時,也得放入點點感情、點點尊重。最忌以為有錢大晒,又或去到盡——我係咁㗎啦,吹乒乓乎?
  
畀貼士,我最記得倪匡叔忠告:第一,不要欠人,寧人欠你;第二,貼士畀在前頭!
  
第一點,即畀貼士要多過平均的,例如一般人畀二十元,你就畀五十元。一般人畀五十元,你就畀一百元,令服務者點點喜出望外。第二點,貼士——我先主動欣賞你,請勿令我失望,我是罕有的好客!
  
上世紀八十年代倪匡叔的教誨,小弟終身受用不盡,尤其在飲食界,更可廣結善緣!
  
昨日坐的士,聽到一個「Cheap精」故事,咁都得?
  
的士大佬剛聽到台叫:「有冇人執到手機?昨晚由沙田去西貢,內有二千元及身分證,拾獲付費一千元,請覆。」
  
司機大佬師傅上身:「又二千元又身分證又電話,係我一定現金唔要,送畀司機!先生,呢個世界乜Cheap精都有。試過一次,丁友由尖沙嘴搭車入沙田,留低咗手機在車,我專誠經隧道送回,你估佢畀幾多?XYZ,十元大洋一個!真有衝動兜嘢掟返畀佢,乜人嚟㗎?」

訂閱星島網singtao.ca電郵快訊,每天可收到最快新聞資訊: https://cloud.marketing.ccue.ca/singtao_subscribe

【看星島*知天下】請立即下載「星島新聞(加拿大版)」App:
iPhone:https://apple.co/2IBi812
Android:https://bit.ly/2Pe8anu
share to wechat

延伸閱讀

share to wechat

延伸閱讀

【黃庭桄專欄】天上人間

【高清專欄】阿SIR切莫烏SIR SIR

【陳雋騫專欄】幸福的聖誕樹

【高慧然專欄】C朗的餐單

都市網新聞