【曾智華專欄】興奮日子又降臨

興奮、興奮、真興奮！踏入季中，馬迷情緒開始高漲。嘩！加埋世界盃（不少馬迷同時也是球迷），真的是——樂不可支，有三個高度興奮的星期！
　　
賽馬方面，香港國際大賽前哨戰明天上演，跟住到「國際騎師邀請賽」，然後十二月十一日高潮正式爆發。今年參賽國際馬特多，因獎金非常豐厚，各國人馬，尤其日本，仲唔成棚老虎嚟搶錢咩！
　　
先講明日，幾位冠軍級人馬登場，包括：一、「甩褲恩」薛恩捲土重來；二、「尺寸之王」布文必將在陣上再顯極級功架；三、澳洲殿堂人馬麥道朗，乃六屆雪梨冠軍騎師，所有級制大賽全贏過，單單今年已掃咗八項一級賽冠軍，包括最巴閉的「覺士盾」，馬迷眼福不淺矣；四、稍稍遺憾，法國冠軍人馬巴米高，唔知點解只得一匹馬上陣，大賽冇分，認真嘥料。
　　
香港方面，一哥潘頓可能「茂波叔」上身，雖則中招，但神奇地及時趕起，可以參賽，立即霸住「加州星球」、「美麗同享」及「金鑽貴人」三匹巨星，坐硬「騎師王」寶座矣。
　　
好嘞！小弟又點睇三場國際二級賽呢？
　　
一、馬會一哩錦標——跑千六米。反高潮，只得七匹馬參賽，意即大部分馬只要過到終點，就有豐厚獎金！咁疏落，當然因驚咗馬王「加州星球」及「金鎗六十」啦。馬匹要儲英雄感，夾硬出賽陪跑，被彈離慘敗，會有極大挫折感，傷自專心，獎金得不償失。呢場買兩隻馬王W嘥氣，雞肋都不如！我會用「夏威夷」做二重彩複式膽拖佢倆。原因？七歲老馬仍不退役，以蔡約翰的識見，當然仍有最少一W在手。兼且此馬曾在上季贏G1，有殺低「金鎗六十」記錄，絕對不容忽視！
　　
二、馬會短途錦標——跑千二米。「福逸」乃擂台躉，腳拖次高分的「顯心星」，以及仍未見盡的「聚才」及「金鑽貴人」已可。又係二重彩複式膽拖，不過唔慌好分頭，冇味。
　　
三、馬會盃——跑二千米長途。兩大巨星馬同場，任潘頓揀。佢先操「浪漫勇士」，再試閘，磨得非常鋒利，但最終仍揀「美麗同享」上陣。呢場兩隻玩晒，唯一可入到第三甚至博腳的，為羅廄「發財先鋒」，上場千八米彈離贏，仍在不斷進步。今次布文出策，肯定再將其潛藏進一步發揮，大家拭目！
　　
大賽日有的馬房拼盡，有的玩「收晒」！後者包括黎、徐、何、賢、葉、賀及姚，可以不理！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。