【曾智華專欄】你想成功？做八公！

最近與昔日《晨光第一線》的班底敘舊，紛紛提到小弟的「金句」。其實大部分我都早已忘記，不過，當時對住同事（下屬）訓示，佢哋則聲聲入耳，不少可能記一世（或嬲一世！）。
　　
例如我最憎人做節目時遲到，因此乃非常不道德行為，必須嚴懲。做廣播，專業基本要求，你必須On Air之前十五分鐘坐定定，準備開咪，除非遭逢意外才可饒恕，否則是死罪！
　　
請各位幻想一下，當每朝幾十萬聽眾等聽搭正及搭半新聞報道時，竟然唔見咗個報道員，有乜反應？覺得理所當然？有冇人會原諒佢早一晚萬聖節/情人節飲大咗瞓過龍失場？你係上司，點處理？
　　
其實任何不能有誤的行業也一樣。例如做港交所、做銀行，甚至做馬會。投資者及客人，會否容忍一次，只是一次，股票、支票或投注未能準時過戶？會否原諒你九點唔開門，因某某職員與男友鬧交失眠後唔知醒？
　　
當時我忠告：「各位同事，想遲到？冇問題！唔該你辭職，改做冇王管的藝術家。又或努力令自己成為超級巨星或大老闆，可以隨意制訂自己的遊戲規則。人人要跟你搵食又怕咗你，咁就得！」
　　
另外，羅啟新最搞笑。佢話：「碌Sir，你記唔記得幾十年前，教我哋想做成功廣播人，要有乜條件呀？（ …… ）就係要做個專業八卦公呀！」
　　
呀呀呀，記得嘞。這個真理，絕少資深老手會傳授新丁或坦白講，因講唔出口！
　　
其實你唔「八」，點做傳媒？傳媒人不用專（因可事事問專家），但一定要「八」。任何公眾想知又關乎社會利益的事，你就要「八」回來！大至國家大事，小至政圈人物的花絮，絕不能話我冇興趣就算數。反之，要鍥而不捨，有天生燃燒欲念去發掘市民有興趣的各種資料發放。
　　
做記者的，更尤其重要有此特質！若冇，請勿入行，以免變成行內的地底泥！
　　
如今香港傳媒，根本養不起只走一條Beat的專職記者。故此，你一定要全能，瓣瓣公共政策範圍的料，都要識「八」。如此，才有足夠癢分畀所屬傳媒日日落鑊！
　　
以前小弟做《晨光第一線》，朝朝主持及監製四個小時節目。唔「八」？扮清高？扮冇興趣知「無聊嘢」（包括娛樂版的Hot Talk）？咁就Out咗好耐啦，點可長期做「最受歡迎節目」（可能有啲水分！）呀？想博符碌？唔該速速彈開！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。