【曾智華專欄】唔見乜乜唔流物物

人生之中，幾乎所有智慧，早早包含在童年時讀的成語及流行的俗語中，例如「臨淵羨魚不如退而結網」。
　　
我讀此句的時候約七歲，如今接近七十歲，足足超過六十年的認知期，無論在學校、在職場、在一般社交圈，真是見盡各種不同年齡的「臨淵羨魚族」。永遠的口頭禪：一、佢就好啦；二、老師錫晒佢啦；三、條友靠擦鞋上晒位啦；四、符碌撞棍原來都可以咁掂；五、我係佢就好啦；六、我有佢咁咁咁都發達/升級/考第一/做博士⋯⋯啦！
　　
呢個族類，有兩個特色——賴及懶。總之所有失敗，全與自己無關，全部社會嘅錯！
　　
另一句俗語，又係人人中到應——「唔見棺材唔流眼淚」。毋須解釋嘞，儍嘅都應明白。呢呢，我就屬人辦。好在流完「眼淚」後，仍有機會補救，尚未遲到返唔到轉頭！
　　
講乜？正是講自己的周身筋骨痛，尤其脊髓神經痛。呢類痛症，上年紀者，十之八九皆有，包括本來Top Fit的頂級運動員。
　　
人的身體，就似一部車。第一，必須保養；第二，會老化。愈早保養，愈遲老化。
　　
年輕時，個個以為架「車」一世會如此，大部分人甚少保養。好嘞，到毛病出現時，後悔經已太遲。
　　
例如身體的筋骨柔軟度，若不早早日日做體操，就會收吓緊啲，收吓再緊啲。年紀大後，加埋老化，即變死死實實，再拉鬆已難。
　　
早前小弟經歷成年脊髓神經痛，終下決心搵「仁醫K」搞搞。之前先由佢助手海哥做基本推拿。一按就話：「碌Sir，你全身都硬晒喎，由腳瓜開始到大髀筋、腰帶、背脊肌肉一直伸延到肩膊頸脊皆如是！」
　　
鬼咩，小弟由細到大都從不做柔軟體操，覺得多餘兼乸型，咁咪抵死囉。終於痛到似「見到棺材」才開始知死，唯有向「仁醫K」求救。
　　
如今？非常有規律又神心，朝朝晨咁早去運動場拉筋及做體操，做足一小時。已經一個月了，好返八成喇！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。