【曾智華專欄】狠辣政客大互片

翻閱報章國際版，見到一位超老政客，不期然自己同自己講：「老友，成九十七歲嘞，好收工，咪死霸爛霸啦！咁搞法，國家邊有前途㗎？」
　　
我講緊邊個？正是過去四十一年，已做過兩任馬來西亞首相的馬哈蒂爾。呢位就快成百歲人瑞者，真係唔化，竟仍走出嚟爭做總統。
　　
歷史學及心理學研究早指出，絕大部分人，尤其男人，一嘗試過權力這興奮劑，必定上癮，從此好難搣得甩。所以，全世界一樣，冇幾多個政治領袖，會真真正正誠心誠意栽培接班人的。反之，扮栽培，引蛇出洞，再搵個藉口殲滅的個案，則比比皆是，不分種族。
　　
馬哈蒂爾當然唔例外。三十年前，在任首相，扮栽培接班人。結果，捧咗安華做副首相，人前人後皆稱佢乃最佳下任首相，出雙入對。
　　
安華唔知真蠢定假蠢，也信以為真。一九九○年開始部署建立自己勢力，毫不避忌將野心顯露。「老狐狸」馬哈蒂爾看在眼裏，當然有所部署，只等機會作雷霆一擊！
　　
一九九八年九月二日，小弟被香港電台派到吉隆坡開國際廣播會議。晚餐時，與香港數碼港剛卸任的主席林家禮在路邊飯店開餐。突然發覺氣氛極不尋常，全街人似在奔走相告，不久，已出現報章號外。因為一個政壇震撼彈突然爆發！正是馬哈蒂爾宣布炒掉接班人、副首相安華，並解除其一切權力！
　　
沒有人敢想像的事，跟着連珠爆發式發生！一個坐在第二權力寶座者，竟一次又一次被控雞姦，就這樣，長期監禁。
　　
不過，如此重手「陷害」安華，並未得到國內外的廣泛認同，結果，坐了幾年後，雞姦罪在二○○四年被推翻。安華出獄後，基於仍有龐大政治基礎及民眾支持，成為最大在野黨領袖。
　　
今個月（十一月）十九日，佢更正式參選首相。而對手正是當日「陷害」佢的馬哈蒂爾。這就解釋到，老馬為乜要九十七歲仍赤膊上陣了。因為恩怨情仇劇本，仍然未到結局，有人可能要有仇報仇呀！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。