【曾智華專欄】口碑是最佳宣傳

作為Die Hard影迷，見到本土電影最近非常爭氣，小弟實在有極大欣喜之感。新導演一個又一個冒出，天才橫溢，技法純熟，兼且題材不斷創新。更值得鼓掌，大部分絕不甘於屈服在純商業套路，又或只關顧內地市場。
　　
其實港產片素來有種獨特味道，故若一旦須考慮其他市場口味，就極易變形走樣，最終搞到三不像，唔湯唔水，處處不討好。
　　
繼《緣份山旮旯》後，近日又一出閘大漏但後上凌厲之作，乃《正義迴廊》。開波日收二十萬元，幕後投資者真係會嚇到失禁！點解？因院商最現實，唔會同你玩理想，更唔會等。票房唔得，一周就收你檔之外，更會只排埋啲山旮旯時段，令你死上加死 ，絕不會給予半點同情。
　　
大公司製作，部部有天文宣傳預算費。例如《明日戰記》，製作投資都幾億元，當然可以撥千萬金元做宣傳，未上畫已經營造出雷霆萬鈞架勢，引起觀眾好奇，燃點入場欲望。如此，怎不開閘彈出？若果有料到，更會愈影愈有，勁如炮彈。
　
不過，小本製作例如《緣路山旮旯》及《正義迴廊》，整套戲製作費只得幾百萬元，何來天文數字宣傳費？
　　
不過，唔怕！因為如今互聯網世界無孔不入，人人都可寫影評，兼且不少水準極高，又有公信力。只要是真好，大群影評KOL自會給予公正評價。
　　
一個KOL有幾萬追蹤者，十個就有幾十萬。一百個又如何？故此，若電影真的出色，很快就會口碑轟傳，令觀眾紛紛入座，然後，客觀形勢自會逼院商加場。小弟過去兩周見證此現象發生在《正義迴廊》之上。
　　
我是開畫日睇長者早場的。估計院商見是新導演、新演員加三級片又血腥，冇乜信心，一日竟只播兩場，真係蛇都死！
　　
不過「奇事」漸漸出現，由第三日開始，已經不停加場，此乃市場推動，而非院商主動。經驗啟示，好的電影，大家必須積極傳開去，盡一分力為優質港產片開拓市場！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。