【曾智華專欄】跑馬、講馬、演戲

電影圈不少犀利演員，經常可以七情上面，做到真嘅一樣，冇得唔服！
　　
馬圈也如是。當今「影帝」，看台公認，為完完全全放領，任佢開「龍」或「蟲」的潘頓。其陣上演技段數之高，已到任玩都得境界。點跑都有「專業解釋」，加上地位超然，贏到三十五場，冇一個騎師可以埋佢身，又冇埋莫雷拉，投注額靠晒佢，故可以視競賽小組如無物，因吹佢唔脹，掹佢唔長也。
　　
近期經典演繹，當為上周日第九場，佢坐騎「永遠美麗」乃全日最熱一隻，一點五倍，意即看台公論——行返嚟都贏！
　　
點知⋯⋯各位請重溫再重溫巡邏影片，從多角度「欣賞」佢如何出閘開始就「戲子佬」上身，扮晒嘢，一時走死位，一時頂住前面馬匹屁股，一時又左片右片，終於「完成大業」第三過終點，搞到WQ二重彩⋯⋯等彩池泡湯。
　　
請鼓掌！唔順氣？冇問題。佢立即在下一場又表演由頭放到尾，贏返隻「美麗宇宙」，五點五倍，足以補數，令馬主郭少明順返條氣。
　　
今晚老潘可能又再表演「忽龍忽蟲大法」。小弟幾肯定，佢騎告仔的「狀元及弟」會開「龍」。因此君凡騎告廄馬，皆打醒十二分精神。無他，告東尼為大行家兼手執多匹超級馬（例如「美麗宇宙」一類老虎），你玩佢，分分鐘唔見上千萬元獎金也。
　　
另要留意為巴度。幾期賽事前，當「福逸」出陣，佢立即龍精虎猛，連𡁻三場。之後，又再「冚旗落客」，等日子再食大茶飯。今晚出足九場，分分鐘會起筷。先𥄫實頭兩場佢有冇鬥志，有就跟進，大家存記，祝好運！
　　
講完「馬場演員」，講講另一類演員「評馬演員」，事實，評馬也是表演。本報馬經版老總黃以文及星級人馬安西教練，最近撈過界，走去做演員，在叫好叫座的新片《正義迴廊》中粉墨登場，扮法庭證人，有板有眼，顯出另一類潛質。
　　
此片不少人睇一次以上。點解？你入場就知，瓣瓣極高水準，有欣賞價值也。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。