林俊賢舊愛Winnie認帶林鈺洧驗DNA

林鈺洧將Winnie視為第二個媽媽。

（星島日報報道）應屆港姐冠軍林鈺洧（Denice）父母林俊賢及Jasmine最近因家暴、墮胎和驗DNA等等前塵舊事而隔空互罵，Denice更聲稱父親從沒撫養過自己！本報聯絡到林俊賢的前女友Winnie，對於驗DNA一事，Winnie直言當年是她的主意，而林俊賢獨家回應了當年給Denice生活費的來龍去脈！

港姐冠軍林鈺洧（Denice）母親Jasmine高調接受傳媒訪問，將家事公諸於世，Denice承認15歲曾被要求驗DNA，更暗寸爸爸善忘。
爆有人失蹤拒簽紙離婚
林俊賢透過微信向本報澄清：「Denice在15、16歲，當我同佢見返面時，Winnie好似偷偷地拎咗Denice頭髮去驗DNA，我本身冇理，係Winnie驗完話俾我聽，百分百係我個女，所以並唔係囡囡7歲時，我要求莫女士驗DNA！」本報再向照顧Denice多年的Winnie查證，她在電話中直言：「驗DNA確有其事，係我陪佢去驗，因為她媽媽曾在林俊賢面前講過『呢個女唔係你嘅!』所以唔好估估吓，直接去驗DNA！」
Denice堅稱父親從來沒撫養過自己，林俊賢指：「在Denice一歲半至到三歲，一直有俾生活費，佢咁細點會知道我有冇俾錢？可能佢媽咪冇話俾佢聽，佢7歲時，我都全部清袋得返兩千蚊，連屋都冇，直到後尾搵返錢，Winnie就建議幫我搵返個女，所以同Denice見返面後，我都有直接再畀錢佢！」
Winnie說：「看到Jasmine有關報道，我忍無可忍。我在97年經朋友介紹認識林俊賢。坦白講，我感激林俊賢出現，是他將剛分手傷心欲絕的我帶返去正常生活。他與前妻發生的事亦全部告訴我，我要為他澄清幾點，林俊賢好想見返個女，可惜每次約好，跟着又有人話改期，每次都係問攞錢。有段時間，有人要深夜返工，叫林俊賢過去幫手睇住個女。98至99年間，林俊賢見完Jasmine同我講：『佢終於肯簽紙離婚，之後我哋可以結婚啦！』本來約好律師，點知又突然玩失蹤，嗰次之後，我哋完全搵唔到Jasmine，所以到現時傳媒只會稱我是他的前女友。」
撐林俊賢性格不火爆
對於林俊賢被指控家暴，Winnie說：「我跟林俊賢生活五年，他從來沒對我動過粗，推撞也沒有，甚至大聲講嘢都好少。他的性格不火爆。我亦是意外懷孕，他從沒叫我去墮胎，更加無叫我個仔去驗DNA！佢當時賺錢唔多，但都要我入養和醫院住頭等，係我話唔好浪費住二等房就好！個仔出世後，佢會幫手餵奶，假日我哋會去酒店游水，出去玩，所以我唔相信佢會做出家暴的事！」
目睹獨居生活感心痛
林俊賢結識Winnie後誕下一子，Winnie知道林俊賢想搵返個女，所以利用Facebook尋親。Winnie說：「我唔想將來如果我有事，冇人話到俾仔仔聽佢有個同父異母嘅家姐，於是我用Facebook去搵，亦終於搵到，起初佢根本唔知道我身分，直到同佢有咗感情後，我先話俾佢聽，第一次見面在利園嘅Cova見面。第一眼覺得佢好靚女好高大，化咗個好濃嘅妝，唔係好配合一個14、15歲嘅年紀！她當時說生活過得不好，一個人出嚟住，我心想點可能14歲一個女仔出嚟住？覺得佢好可憐。我叫佢帶我上去佢住嘅地方，上到去真係嚇親，個心好痛，見到佢一罐午餐肉係食三餐。」
她續說：「當時林俊賢還未見過個女，你哋唔好以為我係愛屋及烏，我當時已同林俊賢分開，我勁記得，Denice同我講過在外人面前，佢唔可以叫媽咪做媽咪，要叫佢做表姐，因為佢話阿媽仲要結交異性，佢亦提過在她15歲時，其母想介紹她入娛樂圈，而佢唔願意！其後我陪佢去買傢俬同幫佢搵學校，再隔幾個月，林俊賢第一次見佢。我十分鍾意Denice，佢係一個本質好乖嘅女仔，佢亦成日話我係第二個媽媽。那時開始，林俊賢亦有盡返做爸爸責任，每月都有生活費給Denice。往後，我同Denice愈來愈親近。有段時間，她住在我屋企，在我公司返工，感情好好，但我知她媽媽不喜歡我跟她女兒感情太好！Denice曾對我說，佢媽咪有時對佢態度好差！今天我仍希望Denice有個美好將來，希望Jasmine能為個女着想，唔好再搞咁多嘢！」
有人教唆林鈺洧拍三級片
最後Winnie還說：「Jasmine，你還記得我們曾通過電話嗎？還記得Denice住在首任男友屋企時，有人教佢要問男朋友攞錢嗎？更有人當時叫她去拍三級片嗎？」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。