【曾智華專欄】隻揪Vs.對賭

活在香港，新聞不絕，真的是非常「充實」。故此，從事傳媒工作，無論你點睇近兩年自由空間收窄，仍是相當過癮，不愁寂寞。
　　
單單早幾日的「隻揪事件」，已哄動整個學術界及政界，我哋呢類血液充滿傳媒細胞者，當然個個「說三道四」，將本來茶杯裏的風波搞大，令大家又有漫畫睇，茶餘飯後又多多話題。
　　
「隻揪張」事後潛水而去，低調一輪之後，又睇睇有乜新搞作嘞。佢咁容易扯火，肯定好快又有新聞「娛樂」大眾，哈哈！
　　「
隻揪」盛行完，上周三又彈出一個大家有興趣的用詞——對賭。
　　
可能近月美元大強特強，國際炒家又紛紛𥄫實港元，睇睇有冇機會追擊，好似早年咁，當香港做「提款機」。相信中央及港府一定聞到味，故首先喝住。先由中國證監會副主席方星海叫陣，警告大鱷們——不要與中國和香港對賭（Don't bet against China and Hong Kong！）。
　　
意即若你郁手，分分鐘變燒手指，咪話唔事先聲明，頗有近年流行的「戰狼味」。
　　
本來若方副主席只係講到呢度就最理想，點知佢補多一句——不要看太多國際媒介報道中國，因其不了解中國，也很短視！
　　
呢呢，咁就弊弊冇咁弊。因今次國際金融高峰會議，正正是要「唱好」香港。要「唱」，不能靠自己把口，一定要靠傳媒報道。今次會議，特區政府請來全球媒體，正是要靠人「唱」。正常公關，當然要討好佢哋，望在電視台、互聯網出樣出聲出筆時，美化一下香港啦。
　　
喂，如今你一招「橫掃千軍」。將心比己，若你是外國媒體、記者及KOL，有乜感受？唔使小弟畫公仔畫出腸啦吓嘛？無論官員或政客，若不懂同傳媒打交道，你話後果會點吖？
　　
講返「切勿與中國及香港對賭」，相信這個中央與特區早有默契，替今次會議喝住國際炒家，故才再三提醒——我哋外匯儲備有四千三百億美元。
　　
希望與會者收到「我哋會嚟真㗎！」這訊息啦。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。