【曾智華專欄】馬經老闆喊到失聲

剛剛周三，下午掛八號風球，馬會宣布當晚快活谷賽事取消。即時小弟手機彈出無數咁多滿臉眼淚Emoji，全部來自忠貞馬迷老友。非馬迷例如我的老婆大人，絕對無法明白取消一日賽事有乜咁巴閉——跑少一日使死咩？
　　
唉……當然費事解釋，因呢方面，接唔到同一波段，正所謂Wave Length不同，無法對嘴。
　　
賽事若果早一日宣布取消，好得多，因不會搞到損失慘重。首先，由隔夜開始至周三中午落的注，全部作廢，要搞一大輪退款。
　　
馬場之內，各個飲食點，也全入晒貨，工作人員也早就位準備。當日可能浪費了大量食材，認真可惜。不過，馬會「財雄勢大」，蝕幾百萬元，甚至上千萬元，好快可以賺返。
　　
不過，有一類人，慘矣。正是幾十份馬經的老闆們，簡直同聲一哭，因一切投資化水也。
　　
事緣周三早上，天文台已有預告，下午十二點到下午兩點會掛八號波。如此情況，就算你屬幾鬼癡心的馬迷（例如小弟），會否去買份馬經呢？當然唔會。嗰朝我經過報攤及便利店，全部早早馬經有齊，長蛇陣咁排出。但當然一份都賣唔出。馬報可以回紙，意即全部回水，報章作廢！一切投資蒸發！若你是投資者，都怎不嘔血，苦過Dee Dee，慘過梁天來（究竟有冇人知佢乜水？唔知？上網查查啦）。
　　
小弟認識最賣得的一份馬報老闆，相信單單周三那天，已唔見幾十萬元，簡直災難！
　　
算嘞算嘞，天意！總之，只要有得馬照跑，慢慢一定可以賺返，向前望可也，積極啲！
　　
馬季開始步入高潮，練馬師黎昭昇的新子彈陸續登場，明天先出「喜報圍家」，父系巴閉，出自Shooting To Win，曾摘下澳洲一級考菲爾德堅尼大賽，射程千二米至千六米，且看會否令人眼前一亮，我一於十蚊雞WP捧場。
　　
再投資兩隻，方廄的「喜旺駒」及蔡廄的「烈風」，兩皆「老虎」！二串三W！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。