【曾智華專欄】倫敦邊個會戴口罩？

倫敦邊個會戴口罩？
　　
「0+3」之後，湧入香港的遊客未見踴躍，仍然滯滯哋。不過，湧出香港的，則如潮水。
　　
這個根本不用大智大慧者，也應可預見，真係街邊阿叔都知。例如小弟朝朝茶記早餐隔籬枱位大聲公，佢永遠對時事彈三彈四，不過，多數有理，只用簡單邏輯分析。
　　
例如昨天本欄講的林鄭卸任後竟佔用三千方呎辦公室，仲要狂花納稅人一千三百幾萬元，肯定係人都鬧啦，吓嘛？
　　
另外，全世界復常，遊客去歐洲英國又得，去日本、泰國等更得得得，大部分匯率因美元炒高而跌到一仆一碌，乜都平晒。更重要，唔使搞乜乜物物煩到抽筋防疫。走出戶外，又唔使戴口罩，啖啖新鮮空氣！
　　
將心比己，你要旅遊玩樂，會否揀香港？點會喜歡處處窒住兼成日戴住個焗促口罩？
　　
身邊老友最多飛身湧去日本及倫敦。去完日本者回報，五個字——抵玩到飛起！因日圓跌到攤攤腰，但大部分商品及公共交通全冇漲價。
　　
肥B啱啱去完，笑到見牙唔見眼：「大家有幾可能夠使錢唔使諗者？呢，如今去日本就得嘞，真係花得開心，我去完又去！」
　　
不過，肥B見證一個奇景，日本雖開返關，但完全唔多見歐美遊客。滿目的，最多仍是香港及新加坡人，邊個可以解釋此現象？
　　
另外，大狀S剛剛倫敦返，又有體會：「唉，香港，搵邊個肯嚟呀？我去到倫敦，已完完全全像以往一樣自由自在。入境出境，邊仲有人要檢查呢啲嗰啲㗎。不過，又不是無人戴口罩，有兩類人戴，一為長者，可以理解，保護自己，免受任何傳染病感染。但我搞唔清楚的，則是內地同胞，也個個戴口罩，故此，佢哋非常之容易認。至於香港人，當然唔戴啦！」
　　
大狀S也指出，在香港看英國，好似亂過亂世佳人，又換首相又個個行業醞釀罷工。
　　
「其實英國人有一套深厚文化，也有自我完善的調節機制，根本毋須過分擔心！」S曾在英國求學多年，有充分體會。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。