【曾智華專欄】為弱家打氣

周三「食泥宴」，「搵錢騎師」巴度果然冚旗，因上周日已肥到著唔到襪。蔡神仙畀四隻佢騎，全食白果！吹乒乓！
　　
另一個「時蟲時龍」的潘頓，當晚則繼續「開龍」，三W兩P，再掃「騎師王」。周日又如何呢？
　　
當日最令馬迷開心，為兩大弱家爭氣。一為「白果騎師」黃皓楠開齋，「天足貓」爆冷勝出，十六倍。另一隻「牛皇頭」入Q，位置有近四倍。希望再接再厲。
　　
賽馬是體育運動，正氣的馬迷，除捧明星場外，必定會衷心希望弱家爭氣。弱，唔緊要，最緊要見到你有誠意，有強烈鬥心，並不斷進步。如此，就算輸，也會獲得掌聲。
　　
另一位弱家要一提，為上兩季皆未合乎練馬師續牌指引的何良。今季若再未達標，慘矣，分分鐘釘牌。幸而開季至今，老何非常爭氣，雖兵源甚弱，但贏下一場，贏下又一場，如今已有五W，絕對值得為佢打氣，上上上！
　　
到底何良已從練二十四季，贏過多次級制賽，也曾取得冠軍暨遮打盃，包括二○○八年「包裝大師」及二○一○年「好先生」。若冇料，豈能如此？不過，人的運程總有高低，希望何良憑自身努力，令今季再開「高」啦。
　　
另一值得品題騎師為周俊樂，本來出道順風順水，也有師傅韋達錫晒。但⋯⋯馬圈經常有馬迷不明的「分手事件」，一度糖黐豆的師徒，話分就分，韋達改為錫希威森去也。
　　
冇咗師傅支持，周仔一度低沉。沉，唔緊要，但必須沉得住氣。總之你騎功有進步，陣上有表現，自然有練馬師畀機會。
　　
明顯今季周俊樂由騎功到膽識都大進，近期四連勝，終贏夠一百W。前途在佢手。
　　
講講明日，跑快活谷日馬，以往經驗，例爆，兼爆到七彩。最具欣賞價值為第八場，三班跑一六五○米。十隻參賽，七隻有同程佳績。大熱，一定不會是潘頓的「二雋」，因今季出兩次皆第五，兼排十檔。不過，今次換上潘頓，又有賠率，極有可能呢場起筷！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。