通宵折騰冇嘢出

上周日晚,因翌早照腸鏡,故要先行「灌水刑」,全日不准食固體食物,只可喝粥水。到晚上,遵醫生吩咐,七點拆一包瀉藥。十年前食「政府電鍍藥粉」恐懼未散,今次當然有啲怕怕。幸而私家醫生的,是橙味,咁都冇咁驚。一睇產地,咦,祖國貨……有得揀咩?
  
按指示,先溝出零點一五公升,兩啖飲晒,冇難頂氣味。不過⋯⋯跟住要飲一點五公升水呀!願唔願都要頂!心諗,又藥又水,兩小時後應掂啩?點知⋯⋯大鑊!睇住個鐘九點、十點⋯⋯肚就咕咕聲隆起⋯⋯但毫無便意。然後再十一點⋯⋯十二點,死咯,瞓唔瞓呢?若一落牀就嚟料咪弊?點敢瞓呀?但又的確眼瞓!
  
結果,死頂,凌晨一點開始仍冇料到,咁⋯⋯睇套戲先啦。三點睇完。喂!有冇搞錯,乜瀉藥嚟㗎,點解完全冇得瀉?玩咩!結果,一點五公升水大部分變尿排出。心諗,若如此捱到天光,人都暈啦,點做手術呀?
  
終於,本來醫生叫天光先食第二包藥,唔好喇,一於提早四點再開。又係先溝零點一五公升飲清,之後再灌一點五公升水,即前後飲咗三點三公升,死未?頂到上心口啦,若果仍冇,咁個肚會爆喎!
  
結果,由第一包瀉藥開始,捱咗十個半鐘先有「萬馬奔騰」感覺,但已接近清晨,真係吖。
  
犀利!一係未有效力,一有效力,就似如來神掌發功,驚天地,泣鬼神,連續兩小時冇得停,即係搞到天光先有得瞓。
  
但⋯⋯瞓鬼瞓馬咩,九點鐘已要到手術室。冇法,唯有又肚餓又瀉到腳軟情況下,搭住老婆大人扮手杖,召的士到醫療中心。咁款,當然虛弱,好在早知,帶多兩件衫頂住呼呼聲的冷氣。
  
幫襯私家,當然貴,但勝在藥水好味啲,私隱大啲,病人衫褲乾淨啲,手術室也新淨啲,當然,護士也溫文有禮啲(其實公家的,不少也非常好,但忙到甩轆,難有要求)。
  
萬事準備好,瞓上手術牀,等呀等,等乜?等醫生出現「行刑」囉。 

點擊以下6大平台 接收加拿大新聞及生活資訊
加拿大星島WhatsApp報料熱線:(437)428-9394

下載「星島新聞(加拿大版)」App,隨時看到最新最快新聞:
iPhone:https://apple.co/2IBi812
Android:https://bit.ly/2Pe8anu

訂閱加拿大星島網電郵快訊,每天可收到最快新聞資訊電郵: https://www.singtao.ca/subscribe/singtao.php

>>>訂閱CCUE YouTube 頻道,查看更多吃喝玩樂、生活資訊影片。
share to wechat

都市網新聞