你搶人才我搶錢

特首第一份《施政報告》，最大亮點為——搶！搶人才，搶企業。坊間不少人對個「搶」字不以為然，覺得有點Cheap，也有點暴力。
　　
這兩看法有其道理，不過，個「搶」字真係好「搶眼」，搞到大家唔關注都唔得，單計收視，又的確幾高。只是一切要講結果，且看香港提供的條件，有幾多人才及企業「騷」先！
　　
香港通關，雖然窒吓窒吓（要關注中央看法！），但其實都復常得七七八八，唱歌跳舞又得，大型體育活動又得，似乎做多過講，好現象也。尤其香港馬會，更大打爭氣波。
　　
冇得唔服！疫情三年，一樣馬照跑。如今慢慢復常，當然更要打響全季最重要的一炮——香港國際賽！一定要搞到全球賽馬江湖矚目！
　　
可能處處經濟差到飛起，也可能國際馬界睇見香港如今冇乜「大老虎」馬，咁仲唔一齊飛撲來搶錢？
　　
今年四項一級賽，總獎金高達一億一千萬港元。老友，你可知如今港元匯率，拜美元升到嘭嘭聲，有幾勁？若果你是日本、英國呢啲幣值跌到蓬蓬聲國家，面對黃金機會，點會唔搶錢？我一睇報名表，「嘩」的一聲，犀利，全球「巨星馬」十二月湧到，大搶特搶（獎金）！
　　
今屆參賽馬卡士之高，令馬迷有無限期待感。因為N匹國際頂級冠軍蜂擁報名，決一雌雄。十二月，香港在國際賽馬界，將閃出一道光芒，頂住其他「霉氣」，大大力沖喜一下也。
　　
今屆搶錢最積極為日本隊，六十三匹精英傾巢而出。練馬師方面，歐洲一哥岳伯仁出八匹，肯定不會空手而回，必須留意。
　　
講住咁多先，先度度今晚「食泥」賽事。
　　
上周日「搵錢騎師」（唔好問我點解）巴度食到嘔、出奶油，今晚應該同潘頓雙雙「夢遊」，讓路二三綫騎師，尤其華人仔執返多少生活費。
　　
若如此，我會粗粗哋搵三隻WP過關！梁家俊「好好心得」、楊明綸「王炸」及陳嘉熙「駿爵士」。兩隻入位已可開大餐！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。