唔驚插入最驚灌水

年紀有返咁上下，聽醫生指示，必須定時驗身，包括驗血及照呢樣照嗰樣。其中大腸癌長踞「殺手榜」一、二位，故個個政府皆忠告市民定期檢查，寧願贊助你嘞，唔該！
　　
點解咁？好簡單，若個個一中就湧去公家醫院求醫，肯定多多資源都頂唔順也。故此，寧願津貼你早驗早醫，咪令瘜肉變成癌。
　　
小弟十年前做過，當時經驗，真係好得人驚！得人驚，並非要做入侵性檢查，而是手術前要先灌三公升難飲到嘔、滿是雲呢嗱加電鍍味的藥水。飲第一杯，OK。飲第二杯，仍可以捱到。不過，大佬，每杯半公升，去到第三杯，個肚谷到脹晒，開始聞到杯嘢都反胃，感覺極惡頂。
　　
然後，藥威力發作，差不多開始長時間黐住個馬桶做人……瀉完又瀉，瀉完又瀉，瀉完再瀉。
　　
呢呢，做直腸檢查，最大噩夢，就正正是呢段過程。
　　
然後，基於瀉到清而又冇乜可以食，當然成個軟晒啦！故此，一定要家人陪同入院，再要著多幾件衫，因身體冇熱量，頂唔順冷氣也。
　　
十年前做完，感覺太難頂，當然想側側膊，避得就避。不過……老友醫生個個忠告：「你上一劑有四粒瘜肉，成十年嘞，過晒安全期㗎喇，分分鐘復發，點都好過有事才搞喎，冇咁豬吓嘛！」
　　
諗諗吓，好！死就死，再行多次「刑」啦。
　　
「碌Sir，如今啲瀉藥，冇咁惡頂㗎嘞。加上唔係政府醫院派嘅，味道好好多㗎。不但冇電鍍水味，反之有橙味，擔保冇你十年前咁難捱，放心啦。總之，跟指示戒口已掂！」老友醫生安慰。
　　
小弟雖是退休公務員，但對於醫療福利（其實絕大部分時候與普通市民一樣，乜都要排幾年），可以唔攞就唔攞，因實在太多人比我更需要。
　　
反正「十年磨一劍」，今次決定重錘啲，去私家醫療中心做可也。
　　
寫此稿時，仍未開始灌瀉藥，但已有點點抗拒。不過，大丈夫，灌就灌啦，死頂一下，如此，三天後，又會變回一條「冇瘜肉」的好漢！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。