做人切忌「大喊十」

人以群分,物以類聚。小弟生性Positive,所以,最怕與班乜都Negative的Haters交往,話不投機半句多。佢哋睇樣樣事都負面,乜都衰,挑挑剔剔,講到就快世界末日咁款,好冇趣。
  
以前因要返工,被逼乜人都要接觸,自然正人、邪人、樂觀人、悲觀人……只因工作需要,就見,就交往,幾唔鍾意也冇法,因This is myduty,專業人就做專業事。
  
幸而這生涯不會一世。退休一刻開始,立即來個「斷捨離」大法,將所有負能量Haters斬斬斬,斬去連繫。將時間改為結識同聲同氣人,快快樂樂過活。
  
一年前四圍飲飲食食,去到一家「凱日」酒家。基於其燒臘師傅Philip極有料到,故此很快變熟客,連執行董事張梅姐姐也經常聯絡,有乜想食或訂位,口到拿來。
  
豈料四個月前突然唔見佢再上班,乜事呢?問經理聰哥。佢苦口苦面話:「唉,梅姐事事親力親為,昨晚打烊後到廚房幫手,唔小心踩在油污上,成個人向前仆,對手一叉,右手腕卜的一聲,大細骨斷晒。立即送醫院做手術,要用螺絲、鋼片駁返!」
  
四個月轉眼過去,昨晚又到「凱日」。咦,離遠已見梅姐精精神神坐鎮指揮。
  
匆匆埋去打招呼:「梅姐,好返未,仲痛唔痛呀?第日入廚房,記住要小心呀!」
  
好一個梅姐,又係Positive之霸,笑笑口話:「碌Sir,意外要發生就發生㗎啦,今次跌倒,可能幫我擋過更大一劫呢,哈哈!冇乜好怨!人生就是如此,禍福相倚㗎!」
  
講完,殊聲調頭招呼人客去。
  
真喜歡與正面又幽默者交往。另一人辦為馬會前主席陳南祿,上月有日打畀我:「碌Sir,我昨晚PK呀!」乜事?原來佢巡新裝修投注站,一跣腳,個頭落地,嘴部大出血,兩隻門牙飛脫。
  
「哈哈,成棚整過,可能兩個月後靚仔過湯告魯斯,佢前面棚牙都係假㗎!」

點擊以下6大平台 接收加拿大新聞及生活資訊
加拿大星島WhatsApp報料熱線:(437)428-9394

下載「星島新聞(加拿大版)」App,隨時看到最新最快新聞:
iPhone:https://apple.co/2IBi812
Android:https://bit.ly/2Pe8anu

訂閱加拿大星島網電郵快訊,每天可收到最快新聞資訊電郵: https://www.singtao.ca/subscribe/singtao.php

>>>訂閱CCUE YouTube 頻道,查看更多吃喝玩樂、生活資訊影片。
share to wechat

都市網新聞