全场兴奋高歌

全场？系几多个人？四个，三女一男！女的，有一位已行动不便，要坐轮椅！男的，正是小弟。为乜大大家戏院，“全场”只得四丁人咁冷落？我唔知，只知冇来的，走宝！
　　
逢周四有个习惯，早上瞄瞄有乜新片上，直觉可看的，就去黄埔戏院睇长者早场。座椅舒服，人流稀少，冇人在旁，更冇人搞搞震讲电话（荷里活广场影院最多，烦死！），真享受。
　　
今期睇《歌声伴我心》（个名老套到爆！），若非知道是讲Helen Reddy事迹，未必会入场。英文片名正是佢上世纪七十年代横扫欧美流行榜的《I Am Woman》。
　　
冇抱大期望，但一开场，即被吸住。吸住我的，乃Cilla Black上世纪六十年代大Hit的《You'reMy World》，后来Helen翻唱，又再脍炙人口，珠玉在前，仍冇畀人唱口水歌感觉，功力真系劲。
　　
虽然劲，但出道坎坷。一九六六年揸住歌唱比赛冠军奖品——唱片合约，由澳洲直闯纽约，遇上的，全部冷面孔。
　　
因其时乐坛尽是男性天下，流行榜位置，全被The Beatles、Bee Gees、Deep Purple、Rolling Stones等摇滚乐队霸晒。一个土味十足澳洲女人，离婚，仲要拖住三岁女儿，边有唱片公司总裁骚吖？个个觉得同佢出唱片？嘥子弹啦。
　　
直至遇上专业经理人Jeff Wald，才撞下撞下，撞出一道歌坛彩虹，神话式成为美国首席女歌手。
　　
唔讲唔知，佢首《I Am Woman》初初放畀唱片公司高层听，一致觉得是垃圾，大侮辱！
　　
但Helen天生斗心韧力惊人，正如歌词两句：I'm strong, I'm invincible（我坚强，我不会被摧毁！），终于成功。结尾高潮，佢以花甲之年于二○一七年出席争取妇权大游行，万计女性齐唱此曲，我都弹起一齐唱！

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。