全場興奮高歌

全場？係幾多個人？四個，三女一男！女的，有一位已行動不便，要坐輪椅！男的，正是小弟。為乜大大家戲院，「全場」只得四丁人咁冷落？我唔知，只知冇來的，走寶！
　　
逢周四有個習慣，早上瞄瞄有乜新片上，直覺可看的，就去黃埔戲院睇長者早場。座椅舒服，人流稀少，冇人在旁，更冇人搞搞震講電話（荷里活廣場影院最多，煩死！），真享受。
　　
今期睇《歌聲伴我心》（個名老套到爆！），若非知道是講Helen Reddy事跡，未必會入場。英文片名正是佢上世紀七十年代橫掃歐美流行榜的《I Am Woman》。
　　
冇抱大期望，但一開場，即被吸住。吸住我的，乃Cilla Black上世紀六十年代大Hit的《You'reMy World》，後來Helen翻唱，又再膾炙人口，珠玉在前，仍冇畀人唱口水歌感覺，功力真係勁。
　　
雖然勁，但出道坎坷。一九六六年揸住歌唱比賽冠軍獎品——唱片合約，由澳洲直闖紐約，遇上的，全部冷面孔。
　　
因其時樂壇盡是男性天下，流行榜位置，全被The Beatles、Bee Gees、Deep Purple、Rolling Stones等搖滾樂隊霸晒。一個土味十足澳洲女人，離婚，仲要拖住三歲女兒，邊有唱片公司總裁騷吖？個個覺得同佢出唱片？嘥子彈啦。
　　
直至遇上專業經理人Jeff Wald，才撞下撞下，撞出一道歌壇彩虹，神話式成為美國首席女歌手。
　　
唔講唔知，佢首《I Am Woman》初初放畀唱片公司高層聽，一致覺得是垃圾，大侮辱！
　　
但Helen天生鬥心韌力驚人，正如歌詞兩句：I'm strong, I'm invincible（我堅強，我不會被摧毁！），終於成功。結尾高潮，佢以花甲之年於二○一七年出席爭取婦權大遊行，萬計女性齊唱此曲，我都彈起一齊唱！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。