馬親還是BB親？

男性父親馬主，你估佢愛佢BB多啲定愛駒多啲呢？可能個個不同。但以小弟觀察，十個男馬主，十個銀包內或手機內，最少有一至N張愛駒照片，遇到生張熟李，都會成個「慈父」咁款四圍Show，真係百分百「父愛」滿溢㗎。
　　
尤其馬匹未抵港時，更會充滿期望及大計，例如擺邊個馬房、畀邊個騎、專攻乜途程、終極目標跑乜大賽……等等，如數家珍。
　　
事實，小弟雖冇養馬，但也極願意分享老友的喜悅，正如喜歡分享老友做父親的喜悅。當然，更望佢哋贏馬，到時大事慶功搞慶祝會，朋友必可盡享口福，你話幾正呢。
　　
早前小弟在此問：「喂，究竟黎昭昇有乜Quali，可以收到全港最貴練馬費用，每月要七萬幾元呢？貴過晒蔡神仙、告仔及羅富全噃！」
　　
之後老黎安排旗下馬出賽幾次，只得周三一W，究竟是否練有所值呢？
　　
終於老友「馬主L」拆解疑團：「碌Sir，其實佢第一個月收得貴，合理㗎。因接手一個新馬房，乜都要重新買過，又要添置新設備，簡單講，墊地的報章及禾稈草都不能用上手的啦。所以，第一個月費用貴，有啲誤導。過多幾個月，應該收費會降低㗎喇。至於有冇料到，好難從接收的舊馬看到。十一月後啦，當佢親自選購的子彈運到，就見真章㗎嘞！」
　　
講新運到的子彈，另一位老友「馬主F」，有匹級制猛料快運到。在外地兩戰兩W，到港時會評六十三分，放呂健威馬房，目標鮮明，先跑幾場加分，然後攻三級賽，若得埋，當然希望在一級賽中大放光芒。
　　
得唔得？要睇。不過，一眾老友已摩拳擦掌做定老西，到時入場吶喊。
　　
呢呢，賽馬樂趣，正正在此！
　　
明日二級賽，「加州星球」唔會出嚟輸。但讓磅賽，最宜偷雞！買多少「嘉應之星」及「勇戰神駒」啦。尤其前者，同屬東廄，入腳已經好好分。
　　
第九及第十場，我會買「自勝者強」及「魅力寶駒」W二串三，兩皆蔡神仙寶藏！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。