仲有人XXX嘅咩？

傳媒生態近年劇變，這是事實。原因有N種，主要是科技飛躍進步，取代不少傳統運作。不過，我發覺不少人過猶不及，亂噏「傳統傳媒必死」，指乃大潮流。
　　
最多聽見人講的似是而非謬論，正是：乜仲有人聽電台嘅咩？乜仲有人睇電視嘅咩？乜仲有人睇報章嘅咩？乜仲有人睇書嘅咩？
　　
對，今時今日，有咗互聯網之後，電台、電視、報章及書刊，角色被分薄。
　　
小弟經常出席各式傳媒生態分享講座，發覺絕大部分出席者，皆只懂人云亦云，也是猛指出電台、電視及報章應該瓜得，但又未諗清楚點解會咁或是否將會如此。
　　
我通常拋出幾個簡單問題，以刺激佢哋對「乜仲有人XXX嘅咩」呢個講法的思考。包括：
　　
第一：個個話電台冇人聽，執得。咁究竟係電台呢個媒介Out咗，定係如今電台節目水準渣波，故冇人聽？朝朝幾十萬部車在路上行駛，若電台能提供精準新聞天氣，再加充滿娛樂性資訊性分析性節目，點會冇人聽？請問究竟係內容出問題定載體問題？
　　
第二：個個話電視冇人睇。其實與電台現象一樣，你應思考是節目唔得定電視台傳播唔得呢？大家睇串流平台也是用電視睇，故此，載體冇問題！當然又係節目能否迎合市場的問題！香港每晚仍有二三百萬潛在觀眾會睇免費電視的，問題在你有好節目嗎？與其話電視已死，不如話渣斗節目應死！
　　
第三：個個話報章已死。對，報章印刷量跌是事實，當然科技是原因，另外，印報章成本貴，加上環保問題及政治問題也是原因。不過，報章仍遠遠未到——死。大家知否如今各大收費、免費報章及馬經印刷量有幾多？（冇人識答。）點解部分報章可以上網免費睇，但實體的仍可賣或派報以十萬計呢？（又係冇人識答。）你哋可知如今一份馬經，已可賣四至五萬份？知唔知點解？
　　
希望同學聽完我的謬論後，刺激到思考，增強分析能力，戒絕人云亦云。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。