獨家丨葉念琛無諗過蔣家旻咁快彈出 露口風:「反骨琪」今晚更冇人性

劇集《美麗戰場》播出四集已被瘋狂討論,除了女主角陳瀅人氣高企外,更令奸到出汁的「反骨琪」蔣家旻成功彈出,身兼監製、導演及編劇的葉念琛見到網上洗版式討論當然鼓舞,坦承比預期反應好,更率先向《星島頭條》預告下周劇情,以及角色未來發展。採訪:杜杜

劇集令陳瀅、劉佩玥和陳曉華三個女主角人氣急升。

不過最有話題性,肯定是蔣家旻演的「琪琪」。

葉導笑言早已講明劇情相當「狗血」,所以預了觀眾反應大,但冇想過會有現在咁勁,「好耐冇TVB劇會有洗版式嘅討論,好似第二集個精華片段放喺官網幾日,已經有44萬點擊,一個post都有400500個留言,我都嚇一驚。」當中葉導最估唔到有兩幕戲觀眾的討論度會咁高,「第一集,『阿寶』(陳瀅)喺小巴聽到哥哥張國榮嘅死訊,估唔到香港同內地都有咁多迴響,好多人都話睇到好感動,證明好多人仲好掛住哥哥。另一幕係第三集,『琪琪』(蔣家旻)俾『靜兒』(劉佩玥)阿哥摑完再俾阿媽(楊卓娜)摑,好多人都話大快人心,我仲見到有人話睇到拍手掌,呢個真係比預期大好多。」

「阿寶」坐小巴時,聽到偶像哥哥死訊。

「琪琪」畀強哥摑先。

再畀阿媽「芳姨」打,真係大快人心。

「賤精三人組」唔會就咁滿足
講到蔣家旻憑「反骨琪」成功彈出,葉導雖然不意外,早前接受本報訪問時已率先預測到,但他承認沒想過咁快,「蔣家旻佢彈起係比我預期速度仲快,3集大家就咁憎佢,但大家要先留意今晚嗰集,佢會更加冇人性。『琪琪』之後都會不斷搞事,今晚同下星期一嗰集絕對唔可以錯過。」葉導更向《星島頭條》爆料,預告「反骨琪」之後發展,因為她會跟「阿寶」一齊參加選美加入娛樂圈,「嚟緊佢會更加激,更加離譜,佢係唔會就咁收手,之後會仲勁,因為家只係屋企嘢,嚟緊嘅利益更加大。」他更封蔣家旻、楊卓娜和吳家樂三個演的角色為「賤精三人組」,「佢哋呢三個人唔會就咁滿足,之後發展佢哋會愈嚟愈乞人憎。」

「琪琪」做的衰嘢都唔少,屈「阿寶」做援交妹。

「琪琪」衰到偷「靜兒」阿媽遺物,仲要屈返人轉頭。

「琪琪」又搞到咸濕「馬Sir」家破人亡。

「阿寶」為還債,決定入娛樂圈參加香港小姐。

蔣家旻同楊卓娜被網民邊鬧邊讚,令葉導都覺得興奮。

除了「琪琪」和後母「芳姨」外,葉導笑言加埋吳家樂就成為該劇「賤精三人組」。

陳瀅劉佩玥陳曉華反面
葉導再爆該劇下周精彩劇情,「下星期會去咗另一個時空,陳瀅、劉佩玥同陳曉華三姐妹會反面,可以預告少少劉佩玥會做咗雜誌記者、狗仔隊,而陳瀅就加入咗娛樂圈,大家估到佢哋應該會有衝突啦!今個星期嘅狗血位會喺家庭,之後戰場會轉到娛樂圈,最後會去到豪門,所以牽涉嘅嘢會更多,會有更多人物出現。」他又叫觀眾記住留意兩個人,「嚟緊要留意李成昌同陳山聰,佢哋兩個都係好重要嘅人物。」他又好肯定咁預測,飾演陳曉華「小美」男友的丁子朗,會成為下個網民熱烈討論角色,「丁子朗啲戲再出街,應該會成為觀眾另一個追擊對象,佢會好乞人憎,大家要留意。」

阿寶、靜兒同小美三個好姐妹,入到社會工作會愈行愈遠。

「阿寶」同「靜兒」一個做藝人,一個變記者,自然有衝突。

陳山聰飾演金牌經理人「王一言」,葉導叫大家記得留意。

李成昌演的社團大哥「威爺」,同樣是之後劇情關鍵人物。

葉導預測,演「渣男」的丁子朗會成為網民下個追擊對象。

訂閱星島網singtao.ca電郵快訊,每天可收到最快新聞資訊: https://cloud.marketing.ccue.ca/singtao_subscribe

【看星島*知天下】請立即下載「星島新聞(加拿大版)」App:
iPhone:https://apple.co/2IBi812
Android:https://bit.ly/2Pe8anu
share to wechat

延伸閱讀

share to wechat

延伸閱讀

張致恒老婆雯雯多次呻窮感內疚 終圓夢湊仔遊主題樂園唔見老公大仔

林嘉欣型格現身BVLGARI聖誕派對 稱聖誕將與家人出埠玩

陳若思逼爆上圍玩遊戲勁吸睛 手口並用搶住答問題網民留言讚好

Amanda S.低胸短裙亮相活動 稱現時熱愛拍電視節目及拍戲

都市網新聞