古天后日誌|又趁北水假期挾淡友

10月5日,部份時間有陽光,有幾陣驟雨,天氣仍然炎熱。英國喺群眾壓力下,撤回減稅計劃,帶動英鎊急彈,歐美股市周一回升,周二澳洲央行宣布僅加息0.25%,低過市場預期,市場憧憬環球加息步伐或放緩,美債息回落,VIX回落,美匯指數回落下,隔晚美股三大指數繼續升,道指升逾2%,標指跟納指升幅更超過3%。美股喺嚴重超賣下,出現技術反彈係意料中事,暫時標指喺3600點有一定支持,反彈阻力大約3850。今晚有小非農數據,其實美國嘅就業數據表現一直唔係太差,失業率保持喺3.6%歷史低位,職位空缺更長期超過1100萬份以上。但6月起形勢開始有變,唔少大型企業宣佈凍結招聘,甚至裁員,令下半年就業市場表現可能較差,最新8月職位空缺已降至1010萬份,係14個月以來新低,環比減少高達110萬份,係28個月以來最快降速。

另一方面,零售市場下半年亦明顯轉差,多個零售商均出現庫存急增問題,銷售急速下滑,零售商一面頭痛緊點樣削減成本,另一面就業市場轉差,打擊民眾消費,美國經濟仍有步入衰退嘅危機。美國要壓低通脹,聯儲局就要收回市場過剩流動性,同時要努力壓低油價,以防止通脹繼續向上。不過油組又點會任由油價一直下跌,損害自己利益,當油價回落至80美元水平後,OPEC即宣布減產,油價又急升至近90美元。

美國目前流動性仍未見緊掘,相比喺2008年金融海嘯後,超過十年時間嘅QE,令市場游資一直充裕得過剩,即使自9月起美聯儲每月收水950億美元,相信最快要明年3月才能吸走7000億美元遊資,屆時隔夜錢滾存遊資仍高達1.5萬億美元,仍是相當偏高,呢個亦係令美股應跌不跌嘅原因之一。不過歐洲就較大問題,尤其企業債務違約形成極大風險,尤其係歐洲企業需要進行再融資,一旦再融資無法完成,大量債務違約將引發金融危機。

至於港股今日應該會借美股連續兩日急升反彈,周一假期前17000關似乎有心要守,不過當日成交不足700億元,擺明係無人入場。至於今日放完假返嚟,就大挾淡倉,至於現貨現水平能否追貨,講真急升至萬八水平先嚟追,只怕過兩日淡友再發動攻勢,資金又被套死。暫時有心買貨都要有心理準備坐長線,皆因呢下美股反彈過後,唔排除又再次掉頭尋底,港股都係隨波逐流,一旦美股再次走弱,港股只會再跟隨其後,向下尋底。

訂閱星島網singtao.ca電郵快訊,每天可收到最快新聞資訊: https://cloud.marketing.ccue.ca/singtao_subscribe

【看星島*知天下】請立即下載「星島新聞(加拿大版)」App:
iPhone:https://apple.co/2IBi812
Android:https://bit.ly/2Pe8anu
share to wechat

延伸閱讀

share to wechat

延伸閱讀

「奈雪の茶」變「奈雪的茶」 為何偽日系品牌爭相「去日本化」?

金融科技影響忠誠 42%港人未來一年想換銀行

BoC Pay推全新「乘車碼」服務 覆蓋全線九巴及龍運巴士

立法會議員參觀煤氣廠提取氫 葛珮帆:冀法例加快配合

都市網新聞