送背包捱罵

香港賽馬會在本星期六舉行國慶賽馬日，為與眾同樂，特別向已登記資料並於當日進入沙田馬場的馬迷，免費送贈潮流背包一個，送完即止。獎賞活動一推出，登記的馬迷十分踴躍，可見很受歡迎。
　　
不過馬會可能棋差一着，未有顧及賭仔一向姓賴的特性，引來不少馬迷和網友的批評，指送背包等如送書包，輸輸聲，認真大吉利是，相當「唔老嚟」。
　　
有些中國傳統思想，用科學角度是不能解釋，只能告訴洋人，某些中文字眼或舉動，對華人來說，是寓意Bad Luck。
　　
正如即使你去到歐洲，見到一些很有藝術氣色的唂咕時鐘，也只會買來自用，絕不會作為手信送給朋友，因為送鐘的同音字，是送終，對方收到後，一定「鐘」你個頭。
　　
又如搓麻將時，當連續三個人都打出一隻「西」，第四個人都想打出「西」，總會被喝止，一係遲多一轉才打，或必須冚埋隻牌打出，以免符合「四人歸西」的意思。
　　
其實這個迷信，是源自靈異電視短劇的嚇鬼情節，卻潛移默化地，成為所有麻將腳的必然禁忌，寧可信其有，不敢冒犯。
　　
有時候，當新一期的《東周刊》出版後，我會送給友人，若適逢跑夜馬，友人自然面有難色：「做乜送本書畀我啊？」我會執生應變：「呢本唔係書，係雜誌，即係集資，等你愈來愈多本錢，長集長有。」友人才會開懷地收下。
　　
賭仔最愛賴三賴四，一旦手風不順，便會乜都賴，可能怨冷氣太大風吹親個頭，或者鬧鬼你搭他膊頭，令膊頭上的兩把火被拍熄，所以冇運行，亦會嫌屋企的衫褲鞋襪亂丟篤眼篤鼻，隨時會絆倒財神。
　　
其實下次馬會送禮款待賭仔，送十蚊三T電腦飛便可，一定皆大歡喜。

加拿大星島WhatsApp報料熱線：(437)428-9394

下載「星島新聞(加拿大版)」App，隨時看到最新最快新聞：
iPhone：https://apple.co/2IBi812
Android：https://bit.ly/2Pe8anu

訂閱加拿大星島網電郵快訊，每天可收到最快新聞資訊電郵： https://www.singtao.ca/subscribe/singtao.php

>>>訂閱CCUE YouTube 頻道，查看更多吃喝玩樂、生活資訊影片。