你幾時騷Quali呀？

上周六本欄標題為《你憑乜收咁貴？》，引起不少馬迷老友反應。
　　
較有趣的比喻為將練馬師視作商品，商品當然有平有貴，正是「百貨有百客」。
　　
小弟絕對明白。我提出的好奇、疑問……正是你件貨有乜咁巴閉，可以一來到這家「香港百貨公司」，立即標出天價，將所有本來賣開的名牌一腳伸走，唯我獨尊？
　　
係呀，睇介紹，三十三歲的黎昭昇，真係好鬼巴閉，上季以一百六十場頭馬刷新紐西蘭練馬師歷史上最高紀錄。呢個冠軍名銜，實至名歸，冇人可以挑戰！加上佢贏一級賽，好似食生菜，一季𡁻下十三場，更一再訓練出當地全年最佳馬匹及打吡馬等等。
　　
不過，睇返同是過江龍的練馬師，單講履歷，大衛希斯絕對不在佢之下。
　　
因希斯曾四度奪得香港冠軍銜，在比紐西蘭更高水準的澳洲墨爾本也曾摘冠，早早打入澳洲賽馬名人堂榜！希斯訓練出的頂級馬也無數！
　　
又睇睇來自澳洲雪梨的蔡約翰。點解佢叫「蔡神仙」？乃因一空降香港，第一季已成冠軍練馬師，贏馬似斬瓜切菜，令一眾本地薑目瞪口呆，紛紛在晨操時𥄫實佢點操馬，同時亦派探子打聽蔡廄有乜特別的設備、飼料及針藥等等。蔡約翰至今已掃下香港冠軍名銜十一屆，累積頭馬一千四百多場，今季仍會大贏特贏。
　　
好嘞，再講一次，我同意「百貨有百客」，但呢件「黎昭昇」商品，睇背景，仍未似希斯及蔡約翰般，長期畀晒級數及戰績你睇。故此，全馬圈才會極度好奇，點解呢件「商品」可以喊價超高？唔該快快騷兩手Quali，睇睇有幾巴閉！
　　
弊在佢至今仍掛免戰牌，縮在山洞中唔知搞乜。老友，千祈咪雷聲大大而雨點小小呀！
　　
今晚有隻馬，我非常有興趣研究，正是第六場葉廄的「紅旺」。引起我好奇，乃因入紙報名時，潘頓本騎同場的「終身美麗」。排位一出，佢竟改騎「紅旺」，而上次殺入位的賀銘年則坐冷板凳。唔……合該有事也！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。