為乜冇剃毛？

生活在香港，真係想悶都好難。因為不停有新聞爆出，簡直幕幕高潮幕幕金，有的更是金兼勁。上周就有一單，真係笑爆嘴！
　　
好日唔見報，經已八十一歲的前教育署署長余黎青萍，突然變曝光人物，提供一單人人奔走相告，笑到碌地的「新聞」。
　　
因佢失驚無神在監警委員會會議中，正在討論虐兒案時，忽然似「師傅上身」，炮轟TVB《香港小姐競選》穿得「太少布」，間接指有賣弄色情之嫌，更拉埋堂堂總經理曾志偉落水。
　　
當時，余太恍似「道德重整會主席」從天而降，搞到現場委員及新聞界窒一窒，再笑到噴飯。
　　
佢言詞之中，竟涉及暗指志偉利用職權睇三點式。
　　
嘩，呢個指控，立即令TVB高層彈起！大大聲譴責余黎青萍言論影響港姐選舉形象及聲譽，揚言對不實指控及惡意揣測，保留一切法律追究權利。
　　
我看，此事純屬茶杯裏的風波，應該好快拆掂。相信余太並非有動機地刻意針對無記，不過，老人家間中順口「老氣橫秋」，通街都係，司空見慣也。
　　
TVB其實應靜靜雞多謝青萍婆婆。因佢一鬧，嘩，成個港姐選舉由冇乜人留意變成全城關注，更一路追落去睇事態發展。如此，肯定多十零二十點收視，廣告費可以提高嘞。
　　
講返選港姐穿泳衣，根本幾十年前已如此，難道有人過去半世紀是活在夢中的？
　　
講單小弟親身見證的尷尬料。一九七八年，我在《歡樂今宵》做個小小助導，某晚參與製作一個在碧麗宮（已蒸發）舉行的大騷，為的正是要將當屆港姐選舉谷到變全城盛事。公司Call齊全部候選佳麗，穿著三點式表演。綵排時，突然間殺出個女高層，向住台上手指指大叫：「十七號（假設），為乜你冇剃毛？吓？」
　　
嘩嘩，咁都講得出口嘅？真係嚇到我呆咗，更何況「十七號」？現場幾百人望住佢，真係「紅都面晒」要搵窿捐！
　　
嗰時小弟先開始知，原來體毛是女性曝光禁忌，所以，一條都不能見光！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。