獨家丨陳安立拍《食得怪》難頂摩洛哥暗黑食物 硬吞藥材煮蝸牛臭到想嘔

陳安立(Brian)最近跟陳俞希(Hailey)拍住主持ViuTV《食得怪 先好嗌》,本來疫情關係已3年冇離開過香港,難得有機會一次過去英國、意大利、葡萄牙、西班牙和摩洛哥等6過國家拍節目,絕對是優差,不過由於今次節目是食暗黑料理為主。Brian強調暫時播出的食物未算刺激,下星期介紹摩洛哥的食物先最惡頂,更封摩洛哥為此行最多難食嘢的國家,真係差啲食到嘔。採訪:杜杜

BrianHailey在摩洛哥見到最多古怪事物,蛇已算好普通。

Brian此行先到英國拍攝《人去公廁 我去公廁》,之後陳俞希再飛到當地匯合他一齊拍《食得怪》,認真重口味,「本嚟好多朋友都好羡慕我可以有得飛,仲一去就去6過國家,但係去完公廁再食暗黑料理,大家都知道唔係想像中咁舒服好玩啦!哈哈!」

Brian此行去了6個國家,覺得摩洛哥食物最古怪。

BrianHailey去摩洛哥,仲有當地人妻、商台DJ謝茜嘉同老公一齊做嚮導。

不過,Brian完全唔介意,仲自認對食物比較有冒險精神,就算明知是暗黑料理,都會抱住人一世物一世心態試一試,「其實唔係好多嘢食真係咁難食,好似之前播咗喺英國食嘅鰻魚啫喱,個樣係怪啲,但其實幾好食㗎!」講到真正的暗黑料理,他認為意大利的活蛆蟲芝士一定有份,「首先你知道裏面係有啲蛆蟲喺度,但因為我哋未啱季節食,啲蛆蟲仲係蛋嚟,但係啱時候嘅話,係直情有啲郁嘅蛆蟲喺度,個樣好恐怖,但而我哋食嘅雖然只係有蛋,但發霉得好勁,個發霉味已經好濃,個質地仲要好黐身,食嘅時候會醬住個嘴,超級奇怪。」

活蛆蟲芝士,表面睇冇乜嘢,其實裏面有大量蛆蟲蛋。

如果啱時候,活蛆蟲芝士係會有好多識郁嘅蛆蟲喺度。

Brian謂此行大部份國家的奇怪食物,其實要專登搵先至有得食,唯獨摩洛哥早已將暗黑料理融入生活當中,「我哋試過去一個家庭度,佢哋燒咗啲白鴿畀我哋食,但係佢哋竟然唔係自己養,係啲白鴿飛嚟佢哋就捉嚟煮,就地取材。」不過令他和陳俞希覺得最恐怖要算食駱駝,「其實我哋最初唔知係咩肉嚟,以為係牛肉,但係又比牛肉濃味,後尾先知係駱駝肉,即刻嚇到我同Hailey唔敢食,最慘係第二日我哋仲要去沙漠騎駱駝,搞到我哋幾有罪惡感呀!」不過要講最難食,絕對是蝸牛,「當地人話係用嚟補身,加咗好多藥材落去煲,但係啲蝸牛個樣好清楚,唔係好似田螺咁,而且好臭好難食,差啲嘔呀!」

就地取材整的燒白鴿,Brian都覺得好神奇。

食完駱駝肉再去騎駱駝,搞到Brian都好有罪惡感。

呢個蝸牛補品,Brian同導遊講(右一)完全無福消受。

蝸牛連殼一齊煮,之後再竹簽挑嚿肉出嚟食。

點擊以下6大平台 接收加拿大新聞及生活資訊
加拿大星島WhatsApp報料熱線:(437)428-9394

下載「星島新聞(加拿大版)」App,隨時看到最新最快新聞:
iPhone:https://apple.co/2IBi812
Android:https://bit.ly/2Pe8anu

訂閱加拿大星島網電郵快訊,每天可收到最快新聞資訊電郵: https://www.singtao.ca/subscribe/singtao.php

>>>訂閱CCUE YouTube 頻道,查看更多吃喝玩樂、生活資訊影片。
share to wechat

延伸閱讀

share to wechat

延伸閱讀

《陳淑芬.星星相識50年.演唱會》圓滿舉行 星光熠熠唱出香港演藝圈光輝50年

陳浩民麥大力同受腳傷照現身 余香凝有「腳頭好」兒子

黎明詩逝世丨去年6月與梁思浩見面 剪超短髮狀態好 獲讚又靚又有氣質

J2患癌主持文頌男完成化療 撰千字文交代病況:活得好冇尊嚴

都市網新聞