过分热情变赶客

一家食肆失败，可以有N种原因。最基本当然系出品渣斗，也可能是服务差，卫生恶劣，取价太贵，楼面态度欠专业，装修或气氛令人不安……
　　
其中一种，真系讲都冇人信，乃主事人太热情！事实小弟顶唔顺几家名店老板及名厨，故此，去完两次后，不愿再去，实在无奈！
　　
点解无奈？乃因并非出品有问题，而是主持人唔识Do。主持人，可能是老板，也可能是大厨。佢哋一心以为同你老友，故“老实不客气”，例如味味菜上枱，佢都会突然出现，狂赞自己出品（可能真系好！），次次口水喷喷，讲极都唔走，懒理现场客人讲紧乜。
　　
试过有位名厨M，凡见我帮衬，就由头盘开始，味味推门入厅房（为免骚扰其他客人，又或乱爆江湖传闻，故一定卜厅房开餐），一系晒最新做菜心得，由零开始话你知佢点炮制，一系就闹老板这样那样，一系就闹政府，总之，负能量满身，凡事都唔妥。
　　
事实M师傅厨艺非常出色，但多口态度则非常赶客，好可惜。试过小弟不想佢最终出事，于是静静鸡揾楼面负责人讲：“喂喂，你可否提提大师傅，唔好过分骚扰客人啦。最理想，我嚟时，佢打个招呼。到上单尾，再出来接受客人致谢，影张相就够啦。若M哥唔改，冇下次㗎喇。”
　　
你估经理点反应？正是苦水满肚：“碌Sir，你已不是第一个投诉㗎啦，M哥心态，就是大晒，完全唔听意见。试过有次同佢讲，畀佢喷到一面屁，话我资历浅，冇经验与客打交道，识乜呀！唉……算嘞！”
　　
结果，赶下一班，赶下又一班，终于好哋哋一家望住维港景色、出品唔错、招呼专业、价钱合理的名店，就咁被“热情大厨”搞到拍乌蝇，因冇一个客人顶得佢顺也。
　　
终于点？你估佢会反省？当然冇。不过，冇晒生意，你话老板会点做？
　　
上周经理来电：“碌Sir，M哥走咗啦，以后来食晚饭，冇人再烦你㗎啦，畀下面啦！”

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。