過分熱情變趕客

一家食肆失敗，可以有N種原因。最基本當然係出品渣斗，也可能是服務差，衛生惡劣，取價太貴，樓面態度欠專業，裝修或氣氛令人不安……
　　
其中一種，真係講都冇人信，乃主事人太熱情！事實小弟頂唔順幾家名店老闆及名廚，故此，去完兩次後，不願再去，實在無奈！
　　
點解無奈？乃因並非出品有問題，而是主持人唔識Do。主持人，可能是老闆，也可能是大廚。佢哋一心以為同你老友，故「老實不客氣」，例如味味菜上枱，佢都會突然出現，狂讚自己出品（可能真係好！），次次口水噴噴，講極都唔走，懶理現場客人講緊乜。
　　
試過有位名廚M，凡見我幫襯，就由頭盤開始，味味推門入廳房（為免騷擾其他客人，又或亂爆江湖傳聞，故一定卜廳房開餐），一係晒最新做菜心得，由零開始話你知佢點炮製，一係就鬧老闆這樣那樣，一係就鬧政府，總之，負能量滿身，凡事都唔妥。
　　
事實M師傅廚藝非常出色，但多口態度則非常趕客，好可惜。試過小弟不想佢最終出事，於是靜靜雞搵樓面負責人講：「喂喂，你可否提提大師傅，唔好過分騷擾客人啦。最理想，我嚟時，佢打個招呼。到上單尾，再出來接受客人致謝，影張相就夠啦。若M哥唔改，冇下次㗎喇。」
　　
你估經理點反應？正是苦水滿肚：「碌Sir，你已不是第一個投訴㗎啦，M哥心態，就是大晒，完全唔聽意見。試過有次同佢講，畀佢噴到一面屁，話我資歷淺，冇經驗與客打交道，識乜呀！唉……算嘞！」
　　
結果，趕下一班，趕下又一班，終於好哋哋一家望住維港景色、出品唔錯、招呼專業、價錢合理的名店，就咁被「熱情大廚」搞到拍烏蠅，因冇一個客人頂得佢順也。
　　
終於點？你估佢會反省？當然冇。不過，冇晒生意，你話老闆會點做？
　　
上周經理來電：「碌Sir，M哥走咗啦，以後來食晚飯，冇人再煩你㗎啦，畀下面啦！」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。