古天后日誌｜今年最重磅IPO中免未見引起市場興趣

8月16日，多雲，間中有幾陣驟雨及雷暴，氣溫仍然高企，天氣悶熱。隔晚美股低開高走，道指收市升151點；標指跟納指分別升16點及80點。喺市場游資仍然充裕下，上升動力仍有，只係成交略見縮減，都要提高警覺。一直推高通脹嘅元凶油價持續走弱，更跌穿92美元橫行區底部，有機會確認轉勢，油價回軟，通脹壓力大減，10年債息回落至2.77%，呢個係支持美股繼續反彈嘅原因。

不過2年跟10年債息仍然倒掛，反映美國經濟仍有機會陷入衰退，不過市場偏偏打賭明年聯儲局唔單止唔再加息，更有幾會減息放水，喺目前美股形勢大好嘅情況下，聯儲局似乎就無放水救市需要，一直只係市場一廂情願嘅睇法。只係美國基金現金水平仍偏高，聯儲局仍未加碼收水，待下月聯儲局開始縮表，加碼至每月950億美元收緊銀根，未知對美股有否負面影響。

港股成交 衰過沙士嗰陣

A股近日表現甚為堅挺，兩市成交維持喺9000億以上，相對港股奀都爆嘅成交，內地股市流動性遠勝港股。上月內地M2增長12%，人行展開4000億元MLF操作，及20億元公開市場逆回購操作，充分滿足金融機構需求。而MLF操作及公開市場逆回購操作嘅中標利率均下降0.1厘，分別為2.75厘及2厘。喺人行放水下，內地股市料有支持。

港股繼續乏善可陳，日復日只有七百幾億成交，以目前港股嘅規模，難聽啲講，仲衰過沙士嗰陣。港股喺20000點水平徘徊，老實講大部份股份估值處於合理甚至抵買水平，但就係無資金肯入場。港股唔上唔落，如老僧入定，買賣兩閒。最怕係一直無成交下陰乾。中免準備招股，應該係今年集資額最大IPO，但都要因應市況大減集資額，只係雷聲大，雨點小，暫未見市場有太大反應，就連新股都未能引起缸邊友興趣，要怪就怪今年以嚟上市嘅新股，幾乎無乜邊隻有好結果，試問又點引起資金興趣。

古天后

(徐狄怡，證監會持牌人)

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。