古天后日誌|港股成交清零遠比確診清零更容易

8月11日,大致多雲,間中有驟雨及雷暴,天氣逐漸轉好,日間部份時間有陽光。隔晚美國公布7月CPI,終於見頂回落,市場預期加息步伐放緩,甚至估計明年開始掉頭減息,美股急升,三大指數向上,道指535點;標指跟納指則升逾2%,分別升87點及360點。標指升穿4200點阻力,納指亦已破位,挾到淡友懷疑人生,熊市反彈嘅力度,往往可以令人有錯覺牛市重臨。

喺市場游資仍然充裕,市場risk on情緒高漲,令美股易升難跌。美國公布CPI後,市場開始傾向相信9月可能只加息0.5%機會增至超過五成,但至年底息口息至3.5%機會仍近半,話喺明年初掉頭減息,未免言之尚早。不過加息步伐放緩下,美匯指數唔再持續向上,資金自然risk on,以尋求更高回報嘅投資機會。

不過美股嘅risk on情況並唔適用於港股,兩大指數重磅股仍受主要股東減持消息所困擾,限制大市升幅。騰訊(00700)主要股東南非基金,事先張揚要喺市場減持,加上騰訊遲遲未見有新遊戲獲批版號,令走勢偏軟。而軟銀啱啱又加碼遠期合約套現阿里(09988),當然係等錢使,但以遠期合約方式套現,總好過喺市場掟貨,接貨嘅大行都會就住嚟沽貨,太低就停唔沽,但當股價稍為好少少,當然就唔會客氣。即係阿里股價將會一段時間被cap住一個區間,即係上周古天后講咗,目前應對阿里嘅策略係高沽低買,短炒撈油水,85-88水平撈貨,92至95左右就沽貨,識玩暫時都係咁樣玩。

內房股暫難有運行

噚日一個謠言話龍湖(00960)商業票據違約,股價一嘢轟落去,單日跌超過兩成,藍籌單日跌兩成,以前邊有咁嘅事,但自從愈嚟愈多中資股被納入恒指成份股,呢啲情況已見怪不怪。龍湖見到公布市值大蒸發,急忙向投資者解畫,並發通告指一切純屬謠言,估計今日點都有啲反殫。只係跌咗兩成,就算低位彈返兩成,一樣唔可以完全收復失地。

市場對內房股信心嘅脆弱程度已經去到一個點,稍有利淡消息,相關股份即被沽至體無完膚。暫時內房股難有運行,最快都要等二十大,阿爺度唔度到計仔點扶返起個樓市,樓市一潭死水,樓價打破過往只漲不跌神話,財富效應消失,拖累內需市場,內地經濟可以話由樓市主導,成也樓市,敗也樓市。但阿爺呢一刻卻醉心於堅持清零,老實講,正常人又點知佢想搞邊科。

至於港股喺眾多中資股組成下,內地經濟情況如何,港股日子也如何,內地經濟喺清零下,真正清零,港股成交亦步向清零,成交萎縮,指數更易被大戶舞高弄低,但個股卻全無起色,睇嚟要股市清零,應該遠比確診個案清零容易。

古天后

(徐狄怡,證監會持牌人)

點擊以下6大平台 接收加拿大新聞及生活資訊
加拿大星島WhatsApp報料熱線:(437)428-9394

下載「星島新聞(加拿大版)」App,隨時看到最新最快新聞:
iPhone:https://apple.co/2IBi812
Android:https://bit.ly/2Pe8anu

訂閱加拿大星島網電郵快訊,每天可收到最快新聞資訊電郵: https://www.singtao.ca/subscribe/singtao.php

>>>訂閱CCUE YouTube 頻道,查看更多吃喝玩樂、生活資訊影片。
share to wechat

延伸閱讀

share to wechat

延伸閱讀

碧桂園突延遲刊發2023年度業績 下周二前未能公佈需停牌

小米SU7定價網民受落 雷軍獲封「雷神」 無懼價格戰「我們從小捲到大」

港交所上季僅12新股掛牌 按年減逾3成

港人北上熱 加劇全港結業潮 執笠關注組爆紅 成員數急升逾3萬 網民籲復活節留港消費

都市網新聞