獨家丨岑珈其揼6位數首做老闆賣醬料 高EQ回應刻薄影評令電影場次激增

岑珈其首次擔正電影《緣路山旮旯》的男主角，有影評專頁的KOL以刻薄言辭批評其外貌，難得當事人大方回應，獲網民大讚高EQ，為應付突如其來的捧場客，電影場次亦由每日60場增至約90場。珈其回覆《頭條娛樂》，「多謝每一個畀評語我嘅人，令我有機會同空間進步。」近年憑網台「試當真」同ViuTV《膠戰》成功入屋的珈其，因知名度大增而有信心首次做老闆，跟前男團PlayTime隊友各投資6位數推出「辣魚醬」，希望在經濟上買個保障。採訪：杜杜 攝影：Stanley 場地：陪著你走甜品

珈其在電影《緣路山旮旯》中，跟余香凝等5位女角都有感情戲。

 

珈其在《緣路山旮旯》中跟5位女主角余香凝、陳漢娜、蘇麗珊、梁雍婷及張紋嘉都有感情戲，有影評專頁的KOL指電影令人難受，更刻薄批評珈其長相，「佢血色稀薄嘅毒X嘴極具存在感，每一次見到佢大大力溝女，心裡面就X出聲，想跳入個SCREEN打X佢，想坐時光機欺凌佢，欺凌到佢大個唔敢做演員。」

 

影評專頁的KOL狂踩電影及珈其外貌。

 

批評成進步動力

這篇人身攻擊的影評換來大量網民狠插，難得珈其以高EQ親自回應，「多謝你嘅分享，我嘅樣衰令你難受，影響到你唔好意思，但我真係真係好鍾意做演員，就算你坐時光機返去我以前細個欺凌我，我都會想做演員。」更坦言樣衰改唔到，但會努力做好演出，希望將來可以得到對方嘅支持。珈其的大方回應獲網民力撐，大讚他演得好，更稱會入場支持他。

珈其高EQ留言回應，KOL即笠水。

電影於上周四（4日）上映，每日只得60場次，經粉絲強烈要求下，戲院近日終增至約90場，而珈其自小長大的「主場」屯門，亦有兩間戲院上映，本周一（8日）他更親到屯門戲院謝票，給力撐的粉絲帶來驚喜。對於今次事件珈其表現相當正面，他重申唔會被打沉，「絕對接受任何評語，其實每一個人嘅評語都係幫助我成長，多謝每一個畀評語我嘅人，令我有機會同空間進步，所以好多謝一路上支持我同畀評語我嘅觀眾朋友，無論係正面定負面，我都會接收聆聽，畀心機做好演員嘅本份，希望可以愈做愈好。」

珈其跟《緣路山旮旯》導演黃浩然，驚喜現身屯門戲院謝票。

 

身為屯門友的珈其，跟導演黃浩然跟觀眾大合照留念。

疫情加速做老闆

自小已立志做演員的珈其，就算被批評都冇想過放棄，不過最近決定經營副業，跟前男團PlayTime隊友梁曉豐（Anjo），各投資6位數搞「辣魚醬」生意，全因疫情令他想為家人買個保障，「自己夢想係做表演，老闆好似離我好遠咁，但適逢有呢個緣份，同埋疫情嚴重時，冇工開真係手停口停，一個人都可以撐住，我唔食我老婆同阿仔都要食，仲有媽咪呢，一定要諗啲辦法。」「辣魚醬」由Anjo親自研發，令珈其一試難忘，所以決定合作放手一搏，「呢個醬咁值得去做，因為我哋唔係做代理，而係Made in Hong Kong，真係自己落手落腳煮出嚟。」不過珈其強調，友誼第一生意第二，會珍惜同Anjo 多年友情，「我哋講過，最後損手爛腳離場，都唔好影響我哋嘅感情。」

珈其跟前男團PlayTime隊友梁曉豐（Anjo），各投資6位數搞「辣魚醬」生意。

 

「辣魚醬」會跟不同食肆聯乘推出新菜式，珈其大讚除了鹹食，連甜品窩夫都夾到。

 

珈其坦承決心搞生意，最想給家人帶來經濟保障。

 

珈其坦承近年憑「試當真」同《膠戰》成功入屋，令他知名度大增加強了信心，「感恩都入咗屋，原來我個身份去做一啲小生意都有幫助，係一個幾啱嘅時機。」他坦承若然機會在兩年前發生，他未必敢試，「會覺得好難喎，點會成功㗎！」知名度帶挈，珈其為「辣魚醬」做了一次宣傳，好多人已透過社交網主動聯絡他，「好多人話想試呀，又話可以喺佢哋餐廳攞貨，或幫我做個網上平台發售，好多人都好幫手，真係好多謝！」

除了「試當真」外，珈其還憑《膠戰》成功入屋。

 

 

珈其出席「試當真」活動。

 

星島新聞集團慶回歸25周年專題網站，請即瀏覽

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。