古天后日誌｜港股表現反覆 21000水平短線支持

7月7日，大致多雲，間中有驟雨，局部地區有雷暴。隔晚美股表現繼續反覆，聯儲局嘅6月份會議紀錄，重申對抑制通脹嘅決心，不過市場對此反應正面，美股由跌轉升，雖然早段道指曾跌逾百點，但至中段做好，收市升69點；標指跟納指則分別升13點及39點，已連升三個交易日。

美國聯儲局周三公布上次議息會議紀要，指該局官員認為通脹前景惡化，因此有理由喺7月議息會議上，加息50點子或75點子。議息紀要稱，目前通脹遠高於聯儲局長期目標，通脹率降至2%可能需要一段時間，而如果通脹高企狀況持續，「更具限制性的」利率水平係可能發生嘅。

美股暫時無乜方向，都係升升跌跌，不過大宗商品價格，油價及金價近日走勢，反映市場對經濟衰退嘅憂慮。但正因呢啲產品價格下跌，令通脹有所緩解，呢個亦係近日美股靠穩嘅原因。不過美國10年期債息喺大量雄金流入強勁美元下而重返3厘水平之下，呢個現象似乎有啲奇怪，喺債息回落至只有2.75%水平之際，按正常情況資金唔會有興趣搶購美債，呢啲唔尋常嘅狀況，令到美國資本市場走勢，變得更唔明朗。

至於中港股市呢邊，雖然有傳聞指美國喺短期內，甚至最快喺本周會取消部份對華關稅，但港股未有借呢個消息向上挑戰22500水平，反而高開低走，出現連續兩個交易日下跌，甚至先後跌穿10(21811)、20(21544)及100日(21541)移動平均線。

可收集幾隻重磅指數股

自港股喺上周完成期指結算，月結及半年結後，假期返嚟走勢偏軟，恒指從22449回落至21500水平，回吐幅度近千點，主要係中概股喺美股呢兩晚表現均強差人意，拖累港股呢邊嘅重磅科網股市走軟，呢批科網股都係恒指權重股，佢哋無運行，咁港股自然亦腳軟。

古天后一再強調，港股轉勢言之尚早，堅持港股目前仍然處於上落市格局，事實上大市重上22000關之後，未見再有大量資金湧入，向下調整亦係必然嘅事。不過大市自3月中成功尋底後，每次反彈回吐，底部一次比一次高，預計今次由22500水平回落至20800至21000水平，調整幅度已足夠，喺21000水平左右，可以收集返幾隻重磅指數股，190元樓下買美團(03690)，240元附近買京東(09618)，若然指數要反彈，優先關注呢兩隻行得較快嘅重磅指數股。

古天后

(徐狄怡，證監會持牌人)

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。