古天后日誌｜美股跟中概股此消彼長  美股再跌吸引力勝中概

6月27日，大致天晴，間中一兩陣驟雨，日間天氣酷熱。上周美股顯著反彈，主要係資源價格下跌，令市場對通脹憂慮減退，上周五美股三大指數上升，道指升823點；標指跟納指升幅更超過3%，兩指數分別創5月18日及5月13日單日最大升幅。至於港股當晚ADR及夜期亦向上，今早喺新加坡黑期時段，無懼道指期貨回吐，升抵21900水平。上周除咗美股反彈之外，加密貨幣市場亦見反彈，可見市場風險胃納上升，市場游資充裕下，資本市場表現反覆，6月美股好友受到多次考驗，淡友亦唔見得有好日子過，好淡通殺令美股投資者無所適從。

聯儲局明示續加息收水

無論美股抑或其他股市，5月未見窮，6月亦唔絕，咁嘅情況下，自然亦唔會有乜嘢7翻生。6月半年結，美股喺現水平半年結，基金經理當然樂見美股可以喺半年結企住喺現水平，不過下個月至8月，美股又步入業績期，屆時各美企一派成績表，只要稍有差池，高估值股份難免又要捱沽。喺高通脹下，6月嘅消費者心指數，已由5月嘅58.4下降至50，高通脹打擊消費信心，零售下滑必然對經濟帶嚟下行壓力。唔單止消費下行壓力大增，聯儲局亦明示為咗控制通脹，會繼續加息收水。

不過，當經濟實況轉為疲弱時，央行又會稍為鬆手，歐央行已表示要一邊加息控通脹，但同時唔會收緊貨幣政策，甚至要繼續QE，以保市場流動性。呢啲睇落係精神分裂嘅行為，令各地股市喺熊市中屢見反彈，令投資者漸漸迷失方向。

至於港股亦喺不知不覺間，一步步重返22000水平，但期間未見成交增加配合升勢，主要係市場唔見有新資金流入，只係靠北水喺唔同板塊輪動，反映內地資金更樂於買入A股多於港股。當港股跟美股出現此消彼長嘅情況，美股跌，港股反而跟住內地股市回升，兩市重磅科技股估值拉近，甚至係美股嘅重磅科網股估值變得更吸引時，資金會如何取捨，聰明嘅投資者自然識揀。

喺目前古天后仍然係等待緊美股反彈過後再出現嘅另一次調整，一旦美股再出現急跌，唔排除會將更多資金投入美股尋找機會，皆因喺相約估值嘅情況下，美企所面對嘅政策風險遠低於中資企業，話就話內地對科網股嘅監管已告一段落，但阿爺嘅心思又豈能輕易猜量，既然如此，何不選擇早已系統化，監管條文準測更清晰嘅美股市場，而要去追逐政策風險較高嘅內地股市呢。

古天后

(徐狄怡，證監會持牌人)

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。