古天后日誌｜美股帶動港股乏成交下殺淡友

5月27日，大致多雲，間中有驟雨及幾陣雷暴，天氣漸變炎熱。美國聯儲局議息會議預示未來數次會議加息半厘，揚言致力打擊通脹，並顯示其決心，但整體言論尚算溫和。美股做好，道指升516點；標指跟納指分別升79點及305點，反彈持續。數據方面，美國首季國內生產總值(GDP)經修訂後按季跌幅為1.5%，預期為跌1.3%。上周首申領失業救濟人數為21萬人，略低過預期的21.5萬人；截至前周持續申領人數134.6萬人，高過預期的131萬人。

美股零售股近日陸續公布業績，Macy業績好過預期，令美股投資氣氛大有改善，不過Gap公布業績後，盤後又出現急跌逾一成嘅倩況。近日唔少美企公布業績後，盤後出現急跌情況比比皆是，反映市場仍然步步為營，呢幾日美股都係處於熊市中嘅反彈，只係熊市反彈都可以挾死人，以至唔少淡友就算處於熊市中都只能慘勝。

受美股挾升所帶動，隔晚港股ADR及夜期均顯著上升，並重上20600水平，估計今日港股高開，只係能否維持升勢，抑或喺缺乏買盤支撐下，又見高開低走，開市後就有結果。不過港股即使進一步推升至20800點水平後，反覆市況將持續，除非大市能企穩20800，成功收復50日線(20850)並企穩，否則港股上落市格局仍難擺脫，指數仍然喺19800至20800之間上落。

重磅股阿里巴巴(09988)派季度成績表，雖然核心純利已連續三季下跌，不過旗下阿里雲扭虧為盈開始錄得盈利，並於各項業務中表現最好，錄得最快增速。正因為阿里雲醒神嘅業務表現，帶動阿里股價隔晚喺ADR大升逾一成，今日能否急升後企穩，並帶動其他科網股做好，呢一點古天后有所保留。睇返噚日港股成交額不足千億元，好明顯係缺乏資金流入，即使今日港股隨美股急升，亦只不過係大戶挾淡倉嘅一場把戲。如果有貨喺手，好趁周末前夕減一減磅，相反無貨喺水，呢啲水平先嚟追貨，值博率有限。咁嘅情況下，古天后寧願選擇食花生，靜待下一輪調整再伺機入場執平貨。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。